U duk paksa e habitshme ajo që deklaroi Lulzim Basha në “Opinion” se mazhoranca ka gjetur një person që do të vetëdeklarohet se ka aktruar në rolin e Agron Xhafës në audiopërgjimin me Babalen. Vetëm një ditë pas kësaj deklarate (pra sot) gazeta Shqiptarja.com shkruan:
“Hetimi i dosjes shumë të përfolur në politikën shqiptare të audio-përgjimit të pretenduar mes Albert Veliut (Babalja) dhe Agron (Geron) Xhafaj, vëllait të ministrit të Brendshëm Fatmir Xhafaj, ka nxjerrë në dritë elementë të rinj. “Shqiptarja.com” mëson se në Prokurorinë e Krimeve të Rënda është vetëofruar një person i cili ka deklaruar para hetuesve se ai ishte personi që kishte aktruar në këtë përgjim të rregjistruar nga Babalja, apo i etiketuar nga vetë PD si dëshmitari X.
Konfirmohet se dëshmitari i vetëofruar në prokurori ka njohje dhe shoqëri me dëshmitarin X, Albert Veliu, dhe të dy së bashku kanë regjistruar bisedën për një tentativë trafiku droge, ku siç ka pretenduar i vetëofruari në prokurori ai ka bërë rolin e Agron Xhafës. “Duke parë zhurmën e madhe që bëri në vend ky regjistrim, vendosa të vetëofrohem dhe të tregoj të gjithë të vërtetën e këtij materiali”, ka thene ai, shkruan Shqiptarja. com.
Ky skenar i mazhorancës për të manipuluar hetimet për Agron Xhafajn ishte i pritshëm për opozitën. Vetë kreu i saj, Lulzim Basha mbrëmjen e së enjtes deklaroi në “Opinion” se fati i audipërgjimit u vendos politikisht nga Edi Rama i cili deklaroi 24 orë pas publikimit se është i manipuluar, sipas një hetimi që kryeministri kishte kryer personalisht. Por Basha tha se pasi Fatmir Xhafaj të nxjerr aktorin që merr përsipër se ka inskenuar audiopërgjimin me Albert Veliun, Partia Demokratike do të publikojë një tjetër material, që ai e quajti “surprizë e madhe”.
Pjesë nga deklarata e Bashës në Opinion:
Fatmir Xhafaj e nisi të vëllanë në Itali 24 orë pasi doli audiopërgjimi dhe u publikuan fakte se ai vazhdonte të ishte kapoja e trafikut të drogës në Vlorë. Agron Xhafaj duhet të ballafaqohej me dëshmitarin X Albert Velinë. Ai duhet të ishte këtu dhe të kryheshin hetime të plota për zbardhjen e së vertetes nga prokuroria. Largimi i tij i hoqi mundësinë prokurorisë të hetojë. Kush e dëgjoi zërin e Agron Xgafës, kush ia pa fytyrën?
Pasi Rama dhe Xhafaj e larguan Agronin, doli vetë Kryeministri dhe i vuri gjoksin kësaj pune duke thënë se audipërgjimi është fals dhe se hetimet i kishte bërë ai në laboratorin e Surrelit. Më pas u kërcënua gazetari e dëshmitari. Brenda 24 orë prokuroria ka kryer 40 veprime në letër, ka pranuar mostrat e Fatmir Xhafaj. Pra hetimet nuk po kryhen nga prokuroria por nga vetë Fatmir Xhafaj. Ne kemi informacione që ata pasi e përcaktuan politikisht fatin e audiopërgjimit do të bëjnë gjithçka për ta nxjerr jo autentik, pra të falsifikuar. Do gjejnë një aktor që do thotë se ka bërë rolin e Agron Xhafës.
Por pasi ata (Rama-Xhafaj) ta nxjerrin audipërgjimin farsë do të ketë një surprizë të madhe. Një surprizë që do i zhysë më thellë nga ç’janë futur. Një surprizë e madhe vjen andej nga nuk e pret”, tha Basha.
/Opinion.al
