Deputët Artan Gace (PS), Omer Mamo (PDIU) dhe Mhill Fufi i përjashtuar prej muajsh nga Partia Demokratike, janë paraqitur pranë Institutit të Policisë Shkencore për të lënë shenjat e gishtërinjve dhe profilet e tyre fotografike.
“Vajta dhe i dhashë shenjat e gishtërinjve të martën në orën 19:00. Jam mes deputetëve që e kanë votuar ligjin e Dekriminalizimit dhe po e zbatoj atë. Dua të garantoj se nuk kam asnjë rekord kriminal as në Shqipëri, e as në ndonjë vend të huaj. Jam i hapur për hetime”, tha Mhill Fufi.
Ndërsa Gaçe tha se “iu përgjigja i pari dhe brenda një ore kërkesës së Prokurorisë. Pres përgjigje urgjente. Hajdutët dhe kriminelët nuk më njollosin dot”, tha Gace.
Deputeti i PDIU, Omer Mamo, nuk pranoi të jepte shpjegime, ndërsa deputeti Aqif Rakipi tha se do ta respektojë organin e akuzës. “Shenjat e gishtërinjve i kanë. Megjithatë, unë do të paraqitem sipas kërkesës së Prokurorisë. Për gjithçka tjetër mund të them që është show mediatik”, u shpreh Rakipi.
***
Kërkesa e organit qendror të akuzës për regjistrimin e shenjave të gishtave për pesë deputetë, erdhi në kuadër të hetimeve që po kryen ndaj disa deputetëve të Kuvendit sipas ligjit për dekriminalizimin, pasi dyshohet se kanë fshehur rekordet kriminale brenda dhe jashtë vendit.
Shenjat e gishtave dhe fotot e tyre, do t’u dërgohen agjencive europiane të zbatimit të ligjit, për krahasim, pasi ka dyshime të forta se janë dënuar penalisht nga autoritetet e huaja.
Deputetët për të cilët prokuroria dyshon se preken nga ligji i dekriminalizimit kanë shkuar në polici ku kanë lënë shenjat e gishtave. Policia Shkencore pranë Drejtorisë së Policisë, Tiranë ka nisur marrjen e shenjave daktiloskopike të deputetëve pas kërkesës së prokurorisë, e cila po bën hetim të thelluar për përfshirjen e tyre në vepra penale jashtë vendit. Deputetët të cilët janë përfshirë në procesin e dhënies së shenjave të gishtave janë: Mhill Fufi, Aqif Rakipi, Omer Mamo, Gledion Rehovica, Armando Prenga dhe Artan Gaçi.
Deputetët e parë të cilët kanë shkuar menjëherë të lënë shenjat e tyre të gishtërinjve janë, Artan Gaçi, Omer Mamo dhe Mhill Fufi.
Deputetët e tjerë kanë 5 ditë kohë nga marrja e njoftimit për të dorëzuar shenjat daktiloskopike.
Deputetët gjithashtu janë fotografuar nga kjo drejtori siç skedohen të gjithë personat në polici, me një foto ballore dhe një në profil.
Këto të dhëna të Policisë Shkencore do të dërgohen pranë Prokurorisë së Përgjithshme, e cila më pas do t’i përdorë ato për të kërkuar nga vendet fqinje, ose atje ku ka dyshime se gjashtë deputetët kanë kryer vepra penale. Shenjat e gishtave do të ndihmojnë në rast se këta persona kanë kryer vepra penale ose janë të dënuar me emra të tjerë.
