Mbetet në fuqi vendimi për pezullimin nga detyra të zv/drejtorit të Operacionit Forca e Ligjit, Artan Shkëmbi.
Gjykata e Posaçme e Apelit la në fuqi masën “pezullim nga detyra” e dhënë nga Shkalla e Parë më 27 shtator, për veprat penale “korrupsion pasiv i personave që ushtrojnë funksione publike” dhe “zbulimi i akteve dhe të dhënave sekrete”
Artan Shkëmbi mbante detyrën e drejtorit të Drejtorisë Hetimore Qendrore në Policinë e shtetit dhe njëkohësisht drejtonte edhe operacionin “Forca e Ligjit”.
Partnerët ndërkombëtarë dërguan informacione pranë Prokurorisë së Posaçme se Shkëmbi është i lidhur me dekonspirimin e operacioneve në nxjerrjen e sekretit hetimor dhe korrupsion.
Pak muaj më parë, Artan Shkëmbi kaloi me sukses procesin e Vettingut në polici duke qenë i pastër në të tri kriteret e vlerësimit, atë të pasurisë, pastërtisë së figurës dhe anës profesionale. /Opinion.al
