Ambasadori i SHBA në Beograd, Kyle Scott, deklaroi se Aleksandër Vuçiç dhe Hashim Thaçi kanë mbështetjen e Amerikës në kërkim të një zgjidhjeje paqësore.
Scott është shprehur se SHBA-të, mbështeten në inteligjencën e shefes së politikës së jashtme të BE-së, Federica Mogherini.
Mogherini është ndërmjetësuese e dialogut midis Thaçit dhe Vuçiçit.
Gjatë një konference në Beograd, për sfidat e sigurisë në Ballkanin Perëndimor, Scott foli edhe për tri çështje kritike që ekzistojnë sot në rajon.
1-Dialogu midis Beogradit dhe Prishtinës.
2-Emri i Maqedonisë dhe mosmarrëveshja me Greqinë
3-Mbajtja e Bosnje dhe Hercegovinës shtet.
Lajm i mirë është se këto probleme nuk janë të pazgjidhshme. Shohim guxim te liderët e Maqedonisë dhe Greqisë. Përparimi në Bosnje nuk është aq i shpejtë. Në Beograd shohim lëvizje të reja sa i përket marrëveshjes për normalizimin e marrëdhënieve (me Kosovën). Shpresojmë se zgjidhja e pranueshme dhe e qëndrueshme do të gjendet shpejt, – tha Scott, cituar nga Shërbimi i Ballkanit i Radios Evropa e Lirë.
Thaçi dhe Vuçiç kanë shpalosur së voni idenë e ndryshimit të kufijve, si zgjidhje e mundshme e mosmarrëveshjeve midis dy vendeve. Mogherini ka thënë se çdo zgjidhje është e pranueshme përderisa është në përputhje me të drejtën ndërkombëtare./Opinion.al
