Kreu i Partisë së Lirisë, Ilir Meta në një konferencë me gazetarët këtë pasdite foli për shpopullimin e vendit.
Meta ka akuzuar kryeministrin Rama për largimin e të rinjve nga Shqipëria, ndërsa shton se i vetmi që nuk dëshiron të përmirësohet situata është vetë kreu i qeverisë.
Sipas Metës, Rama fajëson autoritetet britanike për një fenomen që e ka nxitur ai vetë me politikat kundër të rinjve duke mos krijuar mundësi reale që të rinjtë të qëndrojnë në vend dhe të përballojnë kostot e jetesës.
“Shpreh angazhimin e vendosur të PL për të ndaluar shpopullimin dhe për ti dhënë fund dramës së madhe të vendit tonë. Përshëndes angazhimin dhe lutjet e udhëheqësve të kishës katolike, për të reflektuar të gjithë e për tu bashkuar, për të çrrënjosur arsyet që nxisin të rinjtë tanë të rrezikojnë jetën për të kaluar La Manche me gomone. I vetmi që nuk dëshiron të përmirësohet situata është kryeministri që fajëson autoritetet britanike për një fenomen, të shpopullimit të vendit, që e nxiti ai me politikat e tij kundër të rinjve, duke mos u krijuar mundësi reale të qendrojnë në vend, të përballojnë kostot e jetesës e për tu mbështetur ne projektet e tyre për të krijuar familjet e reja. Mafia në pushtet shkaktare kryesore e humbjes së perspektivës së këtyre të rinjve”, tha Meta.
Më herët, kryeministri Rama tha se për emigrimin e shqiptarëve me gomone në Angli, Britania e Madhe duhet të veprojë si Gjermania duke shtrënguar sistemet e veta. Po ashtu, kreu i qeverisë u shpreh se Britania e Madhe duhet të luftojë bandat kriminale të të gjitha kombësive dhe të ndalojë diskriminimin e shqiptarëve për të justifikuar dështimet e politikave të saj./Opinion.al
