Përhapja e madhe e krimit dhe kanabisit në vend ka ardhur si pasojë e implikimit të krerëve të policisë.
Deklarata është bërë nga ish-ministri i Brendshëm, Dritan Demiraj, përgjatë një interviste të dhënë për televizionin e diasporës “ACTV” në Michigan të SHBA-së.
Demiraj theksoi se para që të merrte detyrën si ministër i Brendshëm, shefat e policisë në qarqe ishin menaxherët e kanabisit.
Sipas tij, këta shefa policie menaxhonin gjithë procesin e kanabisit, duke filluar që nga mbledhja dhe shpërndarja.
Ai tha se një vendim të duhur mori edhe z.Xhafa që largoi këta drejtues nga detyra.
“Këtë luftë ndaj fenomenit të kanabisit dhe narkotikëve është intensifikuar nga ana ime. Tani krimi organizuar ka ngritur kokë, sepse gjatë fushatave dhe gjatë fushatës zgjedhore, lejohen për t’i dhënë sa më shumë vota partisë. Dhe në rastin konkret partisë Socialiste”, tha Demiraj.
