Pasuria e bashkëthemeluesit të Microsoft-it, Bill Gates, ka rënë ndjeshëm me 51 miliardë dollarë në vetëm disa ditë, pas deklaratës së tij se do të dhurojë pasurinë me një ritëm shumë më të shpejtë se sa ishte planifikuar më parë.
Sipas indeksit të miliarderëve të Bloomberg, pasuria e Gates ra nga 175 miliardë dollarë më 3 korrik në vetëm 124 miliardë dollarë më 11 korrik.
Kjo rënie erdhi si pasojë e rishikimit të metodologjisë së Bloomberg për të reflektuar më mirë nivelin e lartë të bamirësisë së Gates dhe angazhimin e tij për ta shpërndarë pasurinë gjatë dy dekadave të ardhshme.
Në një postim në blog më 8 maj, Gates deklaroi se gati e gjithë pasuria e mbetur e tij do të shkojë për Fondacionin Gates — organizata bamirëse që themeloi bashkë me ish-bashkëshorten Melinda French Gates. Fondacioni pritet të përmbyllë misionin e tij deri në vitin 2045.
“Do të thonë shumë gjëra për mua kur të vdes, por nuk dua që njëra prej tyre të jetë ‘vdiq i pasur’”, shkroi Gates. “Ka shumë probleme urgjente për t’u zgjidhur, për të mbajtur burime që mund të ndihmojnë njerëzit”.
Gates, i cili për pothuajse 18 vite ka qenë njeriu më i pasur në botë, ka deklaruar prej kohësh se fëmijët e tij do të trashëgojnë më pak se 1% të pasurisë së tij. Pas rishikimit nga Bloomberg, ai ra nga vendi i 5-të në vendin e 12-të në listën e miliarderëve, duke u pozicionuar pas mikut dhe ish-shefit ekzekutiv të Microsoft-it, Steve Ballmer.
Sipas të dhënave të fundit të Bloomberg më 12 korrik, njeriu më i pasur në botë është CEO i Tesla dhe SpaceX, Elon Musk, i ndjekur nga Mark Zuckerberg (Meta), Larry Ellison (Oracle), Jeff Bezos dhe Steve Ballmer.
