Ambasadorja e SHBA, Yuri Kim ka reaguar pas deklaratës së dhënë nga kandidati i PD në Dibër, Xhelal Mziu, i cili kërkoi ndjesë pasi gjatë një takimi elektoral ditën e djeshme tha se kush blen vota do ta pësojë si ai i Elbasanit, duke iu referuar ngjarjes së ndodhur në këtë qytet, ku mbeti i vrarë Pjerin Xhuvani.
Përmes një postimi në Twitter, Kim shprehet se i vjen mirë që Mziu ka kërkuar falje dhe thekson se ditët e grupeve të armatosura që “patrullojnë” rrugët i përkasin të kaluarës që të gjithë duhet ta refuzojmë.
“Më vjen mirë të shoh ndjesë të qartë nga Dibra. Dhuna e shkaktuar Elbasanit këtë javë nuk mund të justifikohet, nuk duhet të përsëritet. Ditët e grupeve të armatosura që mbajnë copën e ndonjë partie politike dhe “patrullojnë” rrugët i përkasin të kaluarës – e kaluara e shëmtuar që të gjithë duhet ta refuzojmë. Ky incident nuk duhet të përdoret për të sulmuar me egërsi njërën palë ose tjetrën, për të nxitur emocione në mes të mbështetësve. Përkundrazi, kjo duhet të bëjë që të gjithë udhëheqësit të reflektojnë se si ata mund ta drejtojnë Shqipërinë larg nga e kaluara dhe drejt një të ardhme më të mirë.”, shkruan ambasadorja Kim.
Kandidati i PD për deputet në Dibër, Xhelal Mziu iu ka bërë thirrje qytetarëve ditën e djeshme që të njoftojnë çdo rast të tentativës së blerjes së votës, ndërsa paralajmëroi se do e pësojnë “si ai i Elbasanit” për ata që tentojnë të korruptojnë. Ndërkohë mëngjesin e sotëm ai kërkoi falje. Mziu përmes një deklarate për mediat tha se mbështet zgjedhje të lira e të ndershme teksa theksoi se komenti i tij ka ardhur për shkak të emocioneve të forta të momentit./Opinion.al
