Ambasadori britanik në Kosovë, Ruairí O’Connell, hodhi poshtë deklaratat që janë publikuar në media, lidhur me takimin e tij me ministren në detyrë të Integrimit Evropian, Dhurata Hoxha.
Përmes një postimi në rrjetin social, Facebook, ambasadori ka thënë se gjatë takimit nuk ka komentuar zbatimin e Marrëveshjes së Stabilizim Asociimit, apo të drejtat të njeriut, siç është pretenduar.
“Ne kemi diskutuar për sundimin e ligjit, luftën kundër korrupsionit dhe krimit të organizuar. Unë kam thënë se Kosova është në një pikë kyçe dhe duhet të veprojë për të pastruar politikën nga krimi. Nuk kam vlerësuar punën e institucioneve”, ka thënë ndër të tjera ai.
Sipas ambasadorit britanik, një incident i tillë ka ndodhur disa herë, ndaj teksa është në përfundim të mandatit, kjo është një prej gjërave që nuk do t’i mungojnë nga Kosova.
Në postimin e tij, ai ka nënvizuar se Mbretëria e Bashkuar nuk përkrah asnjë parti politike në Kosovë dhe se iu takon qytetarëve të Kosovës që të marrin përgjegjësi dhe të vuajnë pasojat për votën e tyre.
Pas këtyre deklaratave ka reaguar edhe Ministria e Integrimit Evropian duke thënë se “shpreh keqardhje për versionin e kumtesës e cila kishte lëshime dhe ishte shabllon i përdorur më herët dhe i pakonfirmuar nga Ambasada e Mbretërisë së Bashkuar”./Opinion.al
