Ambasada e Francës në Kosovë ka reaguar pas deklaratës në Tiranë të Presidentit Emmanuel Macron në lidhje me pezullimin e heqjes së vizave për Kosovën.
Ambasada e Francës në Prishtinë, u është përgjigjur interesimit të medias duke thënë se theksi i deklaratës së Macron ka qenë më shumë kërkimi i përgjegjësisë nga Vuçiçi për aktet e 24 shtatorit.
Sipas selisë diplomatike Franceze në Kosovë, Macroni nuk përmendi anulimin e vizave.
“Ai bëri thirrje për një frymë përgjegjësie të presidentit serb Vuçiç, dhe të njëjtat pritshmëri i kishte edhe nga presidentja dhe kryeministri kosovar. Pikërisht në këtë kontekst, ai përmendi edhe çështjen e liberalizimit të vizave, e cila ishte një gjest mirëbesimi, por që në këtë periudhë nuk ishte reciproke. Prandaj, ai pret që autoritetet kosovare, sikurse edhe autoritetet serbe, të respektojnë fjalën e dhënë dhe të riangazhohen për të ecur përpara në javët e ardhshme”, thuhet tutje në përgjigjen e Ambasadës franceze për mediat.
