Zbardhet deklarata e dy raportuesve të Këshillit të Evropës për Shqipërinë Andrej Hunko dhe Joseph O’Reilly. Pas misionit faktmbledhës dhe takimit me liderët e partive politike në Tiranë si dhe me deputetët anëtarë të delegacionit në KiE, dy raportuesit shprehen se forcat politike në Shqipëri duhet të angazhohen për dialog, ndërsa bojkoti i Parlamentit nga opozita nuk është strategjia e duhur.
Sipas raportuesve të KiE, forcat politike të angazhohen për dialog, pasi bojkoti i Parlamentit mund të ketë pasoja negative për vendin. Forcat politike nuk duhet të pengojnë reformën në drejtësi, ndërsa vettingu është i rëndësishëm për një sistem drejtësie të pavarur. Me rëndësi është të zbatohet ligji i dekriminalizmit.
Raportuesit e KiE shprehin shqetësimin e tyre për tensionin politik në Shqipëri i cili po pengon impulset pozitive për reformat. Shpresat e qytetarëve shqiptarë për një reformë të plotë në sistemin e drejtësisë nuk duhet frustruar.
Kjo reformë do të ketë implikime për vendin, sidomos në lidhje me pavarësinë dhe efikasitetin e sistemit të drejtësisë, luftën kundër ndërhyrjeve politike në procesin gjyqësor dhe luftën kundër korrupsionit dhe krimit të organizuar. Procesi i Vettingut është shumë i rëndësishëm për të krijuar një sistem drejtësie të pavarur dhe është thelbësore që ky proces të vazhdojë pa vonesa.
“Të gjitha forcat politike nuk duhet të pengojnë këtë zhvillim të rëndësishëm”-nënvizojnë raportuesit. Raportuesit e konsiderojnë si shumë të rëndësishme zbatimin e ligjit të dekriminalizimit. Pastrimi i administratës publike nga çdo lidhje me elementë kriminalë është thelbësore para zgjedhjeve të ardhshme të qershorit, duke theksuar se të gjitha forcat politike të angazhohen në përgatitjen e procesit elektoral.
“Çështja kryesore në lidhje me zgjedhjet në Shqipëri është mungesa e vullnetit politik mes aktorëve kryesorë politikë për zbatimin e Kodit Zgjedhor dhe dëshira e tyre për të politizuar administratën zgjedhore”-thuhet në deklaratën e raportuesve.
Gjithashtu raportuesit e KiE janë të bindur se një dialog politik i rinovuar është thelbësor për stabilitetin e vazhdueshëm të institucioneve demokratike të Shqipërisë dhe për efektivitetin dhe qëndrueshmërinë e reformave. Raportuesit janë të gatshëM për të ndihmuar të gjitha forcat politike, nëse dëshirojnë, për të ndihmuar në funksionimin normal të proceseve demokratike.
