Ish-ministri Ylli Manjani me anë të një statusi në “Facebook” është shprehur në lidhje me një ves të keq të Ramës. Sipas Manjanit, kryeministri ka varësi ndaj telefonit pasi çdo punë e kryen me të. Në fund të deklaratës, pasi ka renditur të gjitha veprimet e Ramës me telefonin, Manjani shprehet se së shpejti do ketë një kompani telefonike, duke ironizuar kështu varësinë e kryeministrit:
Statusi i plotë:
Telefoni është mjeti me të cilin Kryeministri qeveris. E ka huq të vjetër këtë gjë. Me telefon jep urdhra; nxjerr helm; jep porosi; përgjigjet në rrjetet sociale e eglendiset.
Me telefon komunikon me vartës dhe jo vartës. Ministra, drejtorë, gjykatës e prokurorë. Me telefon bën biseda të gjata e të mërzitshme me Bisnesmenë… ka shumë për të folur me ta.
Me telefon ngarkon me punë ambasadorët e shtetit të vet dhe të shteteve të huaj. Me telefon zgjedh deputetët, kryetarët, presidentët e çdo gjë që ka apo nuk ka në dorë të zgjedhë!
Me telefon kontrollon parlamentin, qeverinë dhe drejtësinë! Ndaj sot gjendet një “telefon” në KLP. Ky është Telefoni për të kontrolluar SPAK. Shumë shpejt do shfaqet dhe kompania e re telefonike: RAMA TELEKOM!
