Media ka arritur të zbardhë disa prej mesazheve që dha kryeministri Edi Rama sot në mbledhjen e kryesisë së PS-së ku prezantoi edhe emrat e 4 ministrave të rinj, përkatësisht, Xhafa, Xhaçka, Manastirlliu dhe Shalsi.
“Çadra le të merret me 18 shkurtin, ne do të merremi me 18 qershorin. Mos u shqetësoni, çadrën e opozitës e duan ngrehur edhe disa të huaj jashtë vendit që nuk radhiten ndër miqtë më të mirë të Shqipërisë”, është shprehur Rama, raporton TCH.
Kjo është hera e parë që Kryeministri hedh alibinë se protesta e PD po nxitet nga qarqe ndërkombëtare, por pa i specifikuar ato.
Rama, më tej ka shpjeguar për largimin e Tahirit, Beqajt, Çuçit dhe Klosit. Sipas tij, ata do të jenë në krye të fushatës në qarqe.
Por pse nuk ikin dhe Nikolla e Bushati që janë koordinatorë të qarqeve Lezhë dhe Shkodër?
Rama i ka justifikuar me faktin se “ministri i Jashtëm Bushati nuk u largua për shkak të Samitit të NATO-s në maj dhe Samitit të Triestes së vendeve të Ballkanit Perëndimor, ndërsa ministrja e Arsimit për shkak të procesit të Maturës Shtetërore, i cili sapo ka nisur dhe largimi i ministres së Arsimit mund të sillte komplikacione”.
