Kryeministri i Shqipërisë Edi Rama duhet të mbahet në survejim nga shërbimet e inteligjencës, pasi rrezikon sigurinë kombëtare.
Deputeti i Partisë Demokratike, Ervin Salianji, përmes një shënimi në Facebook, thekson se dorëheqja e kryeministrit Rama është hapi i parë, për t’i hapur rrugën një hetimi të plotë dhe të pandikuar.
“E vërteta e dokumentuar nga përgjimet italiane ishte e njohur për të gjithë shqiptarët, madje një fakt të tillë e dinin punonjësit e policisë, të administratës, e kanë jetuar si “normalitet” qytetarët në Vlorë dhe e jetojnë qytetarët kudo sot nëpër Shqipëri“, -shkruan ai.
Për Salianjin, kjo situatë ku janë përfshirë krim dhe politikë, institucione dhe banditë, ministri dhe organe ligjzbatuese, duhet mbledhur Këshilli i Sigurisë Kombëtare.
Sipas tij, fatkeqësia më e madhe është që Rama bëri që të bashkëjetohej me këtë fakt si normalitet dhe u deshën organet e drejtësisë italiane të zgjojnë furtuna dhe reagime, që të provohej ajo që u tha për katër vite me radhë.
Ai shkruan se publikimi i dosjes gjyqësore në ngarkim të bandës së Habilaj-Tahiri-Rama i vë kapakun denoncimeve të përditshme të opozitës gjatë katër viteve dhe është fillimi i çmontimit te krimit.
“Duheshin përgjimet italiane që e vërteta e trafikut kriminal që udhëhiqet nga ish-ministri i Brendshëm dhe kryeministri, të kuptohet si gjëma që varros Shqipërinë”,-thekson deputeti i PD, Salianji.
Gjykata e Katanias në dosjen prej më shumë se 400 faqesh që vulosi fatin e Moisi Habilajt dhe bandës së tij, përmend edhe emrin e ish-ministrit të Brendshëm, Saimir Tahiri.
Sipas gjykatësve dhe prokurorëve italianë, Habilaj përmend Tahirin si kushëririn e tij, si mbështetës të veprimtarisë në shkëmbim edhe të parave për fushatë.
Grupi i trafikantëve të arrestuar nga policia italiane për 3.5 tonë hashash ishte vënë prej kohësh nën pergjim. Moisi Habilaj, bashkëpunëtorët e tij shqiptarë dhe italianë kanë tashmë një dosje prej 416 faqesh me fakte dhe biseda të përgjuara, ku ata përmendin emra dhe para dhe që është baza e vendimit të Gjykatës së Katanias për burgosjen e tyre.
Pjesë e kësaj dosje është një përgjim i datës 16 dhjetor të vitit 2013 i një bisede mes Moisi Habilajt dhe Sabaudin Çelajt, kur ata sipas vlerësimit të prokurorëve dhe gjykatësve italianë, përmendin Ministrin e Brendshëm të asaj kohe, Saimir Tahiri.
