Ministri i jashtëm shqiptar, Ditmir Bushati i është përgjigjur deklaratave të kreut të Partisë Demokratike. Lulzim Basha në lidhje me ambasadorët shqiptar dhe ndikimin e tyre.
Gjatë një aktiviteti në Elbasan, Bushati tha se çdo ambasador i akredituar e ka raportin me vendin apo organizatën që përfaqëson. Bushati tha se SHBA dhe BE nuk influencohen nga politikanët shqiptarë.
“E di mirë që çdo ambasador i akredituar e ka raportin me vendin apo organizatën që përfaqëson. Nuk besoj në teori konspirative dhe nuk besoj që SHBA apo BE të influencohen nga politikanë shqiptarë. Është thjesht një përpjekje e dëshpëruar për ti bërë bisht një procesi të rëndësishëm për vitet e ardhshme. Gjithçka nis e mbaron te reforma në drejtësi, ndërsa zgjedhjet janë një detyrim kushtetues, jo ne dorën e partive politike. Partitë janë thjesht instrument për vullnetin e qytetarëve. 18 qershori është një detyrim kushtetues. Duhet te respektojmë vendimmarrjen e presidentit. Duhet të angazhohemi të gjithë se bashku për një proces model. Ne jemi të gatshëm për të kërkuar një tjetër mandat për 4 vitet e ardhshme. Procesi i zbatimit te reformës ne drejtësi dhe vettingu është i vonuar për shkak të opozitës. Askush nuk ka mandat për të marrë peng vullnetin e shqiptarëve. Reforma në drejtësi është e shumëpritur nga shqiptarët dhe ndërkombëtarët kanë investuar shumë për reformën në drejtësi”- tha Bushati.
