Në mënyrë krejt befasuese, disa qytete në vend u zbardhën nga dëbora edhe pse jemi në sezon pranvere.
Në Qarkun e Korçës, gjatë ditës së djeshme dhe natën ka patur reshje dëbore me intensitet mesatar në të gjithë territorin të shoqëruar dhe me erë.
Siç raportohet, trashësia e dëborës varion 10 deri në 25 cm në zonat malore. Nisur nga situata e krijuar, subjektet kontraktore kanë qenë në gatishmëri duke kriposur dhe mirëmbajtur akset kryesore nacionale e turistike, për rrjedhojë është mundësuar qarkullimi normal dhe pa probleme në këto akse.
Nga bashkitë vazhdon puna për hapjen e rrugëve dytësore e lidhëse dhe të shesheve në qendrat e qyteteve. Grupet e punës janë në terren për riparimin defekteve sa i takon ndërprerjes së energjisë elektrike në disa njësi administrative.
Në Dibër, reshjet e dëborës janë ndërprerë rreth mesnatës së mbrëmshme, por kanë shkaktuar jo pak probleme.
Reshjet ishin me intensitet të lartë dhe trashësia në qytetin e Peshkopisë dhe Bulqizës arriti në 20 cm ndërsa në zona të thella deri në 40 cm. Për pasojë u bllokuan disa rrugë ku ngelën me dhjetëra mjete dhe pas ndërhyrjes së borëpastrueseve situata u normalizua.
Gjatë natës temperaturat kanë zbritur deri në -5 gradë nën 0.
Ngricat mund të kenë shkaktuar dëme në pemtari, për shkak se drurët frutorët janë në procesin e lulëzimit dhe formimit të frutit. Sa i përket energjisë elektrike nuk ka pasur probleme./tvklan
