Disa zona në veri të vendit, kryesisht në Dibër, Bulqizë dhe Mat po përballen me probleme në furnizimin me energji elektrike, për shkak të motit të keq. Reshjet e dëborës kanë shkaktuar dëmtimin e 11 fiderave që furnizojnë me energji këto rrethe, ndërsa burime pranë Operatorit të Sistemit të Shpërndarjes bënë me dije se ekipet e të gjitha agjencive janë në terren për të riparuar defektet.
“Kemi riparuar 6 nga 11 fiderat që kishin defekte. Më kritike paraqitet gjendja në Sllovë, Zallë Dardhë, Arras e Gollobordë. 5 fidera nuk janë rikthyer ende në punë. Ekipet po punojnë kudo për të mundësuar rikthimin e energjisë, por dëmet e shkaktuara janë të mëdha”, thanë drejtuesit e OSSH-së, Burrel./Opinion.al
