Irani ka reaguar për herë të parë për dëbimin e dy diplomatëve iranianë nga Shqipëria. Zëdhënësi i Ministrisë së Punëve të Jashtme në Iran, Hosein Ghazanfari, shkroi se Shqipëria duhet të kthehet në rrugën e duhur, sepse ajo në të cilën është tani, nuk është e duhura.
LEXO EDHE- Shqipëria e kërcënuar nga sulmet terroriste dhe kibernetike nga Irani
“Shqipëria ka bërë shumë gabime dhe ne ndjejmë se disa ngjarje në vendin tonë kanë krijuar disa keqkuptime për Shqipërinë. Në sugjerojmë që ata mos ti përziejnë mardhëniet tona të mira me një vend të tretë. Shqipëria duhet të kthehet në rrugën e duhur pasi ajo në të cilën është tani nuk është e duhura”, shkruan ai në Twitter.
Kujtojmë se Shqipëria dëboi dy përfaqësues të Republikës Islamike të Iranit për shkak të veprimtarisë në mospërputhje me statusin e tyre dhe parimet e Konventës së Vjenës për Marrëdhëniet Diplomatike.
Përmes një postimi në rrjete sociale, Ministri i Jashtëm Cakaj u shpreh se dy diplomatët iranianë, Mohammad Ali Arz Peimanemati dhe Seyed Ahmad Hosseini Alast, janë shpallur persona të padëshirueshëm në vendin tonë.
Kjo është hera e dytë që Shqipëria shpall diplomatë iranianë si persona të padëshiruar. Në dhjetor të vitit 2018, ambasadori i Iranit në Shqipëri, dhe një tjetër diplomat i ambasadës u dëbuan nga vendi pasi dyshoheshin se ishin ishin të përfshirë “në aktivitete që cënojnë sigurinë në vend”.
Në atë kohë, ministria e Jashtme shqiptare saktësoi se vendimi ishte marrë në konsultim me vendet aleate, për shkak të aktivitetit të tyre në Shqipëri në kundërshtim me statusin e tyre diplomatik./Opinion.al
