Performanca e Policisë së Shtetit dhe roli i saj në parandalimin e konflikteve ka qenë pika që ka përplasur gazetarët me Drejtorin e Akademisë së Policisë, Bilbil Mema të hënën në studion e emisionit ‘Opinion’ në Tv Klan.
Gazetari Mentor Kikia, deklaroi se suksesin e policisë e masim me faktin se u arrestua apo jo autori, por suksesi i saj qëndron nëse do arrihej të parandalohej krimi.
“Kur ne themi se ishte një person i shpallur në kërkim që hynte dhe dilte me pistoletë nga lokali. Një tjetër me precedent penal, na dalin që shumica e atyre njerëzve që ishin aty, duhet të ishin në burg dhe jo në lokal”,- u shpreh Kikia.
Nga ana tjetër, Bilbil Mema tha se siguria publike nuk varet vetëm nga policia, nëse ja lëmë këtë policisë, kjo nuk ka për të ndodhur asnjëherë.
Në debatin mes të dyve, hyri dhe drejtuesi i emisionit, gazetari Blendi Fevziu, i cili pyeti Memën; nëse policia është në dijeni të personave me precedent penalë?
Për Memën, policia nuk mundet t’i skedojë të gjithë personat.
Debati
Fevziu: Kemi vrasës që kalojnë çdo ditë në zonën e ish-Bllokut dhe për këtë duhet të ekzistojë një garanci.
Mema: Unë shikoj një presion që i bëhet policisë në të gjitha drejtimet. Gati-gati, është krijuar përshtypja sa edhe këto vrasje po i bën policia.
Artan Hoxha: Ne nuk pretendojmë që policia me postobllok të kapë persona të tillë, por përmes shkëmbimit të informacionit. Ju mund t’i kapni në mënyrë operative, i keni të skeduar apo jo. Ne po bëjmë zhurmë që pas kësaj ngjarje të mos ketë viktima të tjera.
Fevziu: A ka frikë krimi nga policia apo jo?
Mema: Absolutisht ka frikë.
