Vazhdon prej dy ditësh debati mbi mbledhjen e Këshillit Bashkiak të Tiranës ku u vendos edhe rritja e çmimit të ujit. Pasi në media u deklarua se këshilltarët e PD kanë hyrë në mbledhje për të votuar kreditë e buta dhe më pas janë larguar, PD-ja përgënjeshtron duke thënë se është lajm i pavertetë. PD akuzon mediat se po servirin gjellët e gatuara nga Rama.
Në një njoftim për mediat që nisi sot zyra e shtypit thuhet: “Këshilltarët bashkiakë demokratë nuk morën pjesë në mbledhjen e Këshillit Bashkiak të Tiranës. Ata vetëm bënë një deklaratë në fillim të mbledhjes dhe pastaj e bojkotuan atë tërësisht. Lajmi se demokratët morën pjesë në votimin e dhënies së kredive për shtëpi është lajm i rremë i gatuar në kuzhinën e Edi Ramës dhe i përhapur nga veglat e tij në media, kamarierët e zellshëm që i shërbejnë publikut për ditë gjellët e prishura të Ramës”.
Këshilli Bashkiak i Tiranës miratoi të mërkurën (26 Korrik) me 31 vota pro rritjen e çmimit të ujit për të gjithë konsumatorëët, familjarë dhe biznese. Kuorumi i mjaftueshëm për këtë vendim u arrit me dy vota të këshilltarëve të LSI Agim Kraja dhe Genta Mezini. Një ditë më pas 27 korrik, LSI i shpalli dezertor këta dy anëtarë, duke deklaruar se kavë vepruar privatisht për interesa të lidhura me kryebashkiakun Veliaj dhe në kundërshtim me vendimin e partisë që ishte kundër rritjes së çmimit të ujit.
