Gjatë administratës së Presidentit Biden u forcuan masat për parandalimin e dhunës me armë zjarri, por kur Presidenti i zgjedhur Donald Trump të marrë detyrën në janar, pritet të ketë një ndryshim të madh të politikave mbi armëmbatjen. Korrespondentja e Zërit të Amerikës Veronica Balderas Iglesias bisedoi me zotërues armësh me leje dhe individë që mbrojnë sigurinë ndaj armëve dhe sjell qëndrimet e tyre.
Presidenti i zgjedhur Donald Trump ka premtuar se do të veprojë me shpejtësi që të sigurojë mbrojtjen e të drejtave të zotëruesve të armëve me leje, gjatë administratës së tij.
“Në mandatin tim të dytë, do të përmbysim sulmin e Bidenit ndaj Amendamentit të Dytë. Masat do të jenë të shpejta dhe të forta, duke nisur nga momenti kur Bideni të largohet nga Shtëpia e Bardhë”, u shpreh zoti Trump në 18 maj të këtij viti.
Sipas Qendrës për Kontrollin dhe Parandalimin e Sëmundjeve, pothuajse 47 mijë vetë humbën jetën nga dhuna me armë në vitin 2023.
Presidenti Joe Biden vuri në fuqi një sërë masash që sipas analistëve po ndihmojnë në uljen e këtij bilanci.
“Këtu përfshihen fondet për të financuar programet në komunitete për ndërhyrje ndaj dhunës me armë. Administrata Biden ka forcuar edhe kompetencat e FBI-së dhe Byrosë së Armëve të Zjarrit për të rregulluar këtë industri”, shprehet Jen Pauliukonis e Universitetit Johns Hopkins.
Grupet që mbështesin të drejtën për armëmbajtje thonë se këto masa shkelin këtë të drejtë të përcaktuar në Amendamentin e Dytë të Kushtetutës amerikane. Ata janë të bindur se zoti Trump do t’i heqë masat.
“Ne nuk mendojmë se ata kanë bërë ndonjë gjë për të rritur sigurinë e njerëzve. Gjithçka kanë bërë është shkelja e të drejtave të Amendamentit të Dytë”, shprehet Alan Gottlieb, nga Fondacioni “Amendamenti i Dytë“.
Mbështetësit presin me padurim që zoti Trump të përmbushë premtimin e tij për të nënshkruar një ligj që do të bënte të mundur që zotëruesit e armëve me leje të udhëtojnë në të 50 shtetet me armët e tyre.
“Në çdo shtet që udhëton duhet të shohësh paraprakisht ligjet respektive mbi armët dhe në disa raste, ligjërisht nuk e mban dot. Pra, kjo është diçka që ne do të dëshironim ta shihnim në nivel federal”, shprehet Nik Clark nga Grupi “Wisconsin Carry Inc”.
Djali i Frank Cimorellit, Camden, i cili kishte probleme të shëndetit mendor, vdiq disa javë pasi qëlloi veten, në vitin 2022, me një armë të blerë ligjërisht. Cimorelli do të donte që disa masa sigurie për armët, si për shembull kontrolli i të shkuarës së individit, të vazhdonin të mbeteshin në fuqi edhe gjatë administratës së Presidentit Trump.
“Unë nuk kam asnjë problem me faktin që një prind dëshiron të mbajë një armë në shtëpi për mbrojtje. Problemi që kam unë është, se përse e drejta juaj për të pasur një armë e lë në hije të drejtën time për t’i mbajur armët larg shtëpisë sime?”
Anketimet e Institutit Pew tregojnë se ka një mbështetje të gjerë në opinionin publik, si te republikanët dhe te demokratët për të parandaluar blerjen e armëve nga individë që kanë probleme të shëndetit mendor.
Por amerikanët mbeten thellësisht të ndarë mbi shumicën e propozimeve mbi politikat për armët./voa
