Partia Demokrati ka reaguar pas ngjares të ndodhur ditën e djeshme në strukturat e PS në Shkodër, ku drejtues të lartë por dhe anëtarë të thjesht kanë debatuar për emërimet në poste të ndryshme.
Nëpërmjet Enkelejd Alibeaj, për Partinë Demokratike, ndarja e politikës nga krimi është një prioritet kombëtar.
Nëpërmjet një postimi në rrjetet sociale ai shprehet se prej kohësh PD me fakte dhe prova ka paralajmëruar se si sistemi i PS nuk është më funksional.
“Prej kohësh me fakte dhe prova kemi paralajmëruar se si modeli i ndërtuar nga Edi Rama po përhapet si një tumor në indet e partisë që ai sundon dhe metastazat shtrihen në gjithë aparatin shtetëror. Debatet e publikuara në media nga mbledhja e PS-së së Shkodrës, konfirmojnë se pushteti i rrëmbyer me masakrën zgjedhore në bashkëpunim me krimin, nuk i përket qytetarëve, as socialistëve, por ortakëve të Edi Ramës që blenë vota, shantazhuan, dhunuan, dhe në këmbim marrin kontrollin mbi ato institucione që i shërbejnë më mirë interesave të tyre kriminale. Këto rrëfime janë prova më e qartë se si partneriteti i pakicës plaçkitëse Rama, Doshi, Rakipi, funksionin si një PPP korruptive dhe kriminale, në kurriz të familjeve shqiptare. Pak ditë më parë ata bashkuan mandatet e vjedhura për të konfirmuar ortakërinë e tyre parlamentare, jo për të zgjidhur çështjen e papunësisë, gjendjen e rëndë ekonomike apo korrupsionin që cënon të ardhmen e Shqipërisë, por për të nginjur babëzinë e tyre në dëm të qytetarëve. Përballja me këtë model është detyrë imperative për Partinë Demokratike dhe për shoqërinë shqiptare, sepse ç’kapja e shtetit nga krimi dhe korrupsioni janë e vetmja mënyrë për t’u dhënë fëmijëve tanë një të ardhme më të mirë.”- shkruan Alibeaj./Opinion.al
