Jonathan Cohen, përfaqësues i SHBA-së në Këshillin e Sigurimit, tha dje në mbledhjen e Kombeve të Bashkuara, ku u diskutua çështja e Kosovës, se viti 2019 mund të jetë shumë i favorshëm për Serbinë dhe Kosovën për të arritur një marrëveshje gjithëpërfshirëse.
“Është momenti i duhur që të arrihet një marrëveshje gjithëpërfshirëse dhe kjo është e arritshme në vitin 2019″
Por Cohen ka theksuar se këtu vlen rishikimi i vendimit nga Kosova për heqjen e taksës së vendosur 100 për qind për mallrat serbe dhe boshnjake.
“Për Kosovën kjo nënkupton anulimin e tarifave për Serbinë dhe Bosnjën”, tha Cohen.
Christoph Heusgen, ambasador i Gjermanisë në Kombet e Bashkuara, mbajti një qëndrim më parimor mbi taksën, duke mos mbështetur asnjë nga palët.
Ai tha se “nuk mund të ndodhë që produktet serbe të mos futen në Kosovë, por as që produktet kosovare të mos futen në Serbi, pasi kjo është kundër prespektivës europiane”.
Heusgen i ka tërhequr vëmendjen Beogradit edhe për fushatën e ndërrmarrë për tërheqjen e njohjeve të Kosovës, në arenën ndërkombëtare.
“Daçiq vetë ka udhëtuar në shtetet të cilat kanë bërë tërheqjen e njohjeve. Nuk e kuptoj logjikën që qëndron prapa kësaj: Shpallja e pavarësisë së Kosovës është në përputhje me të drejtën ndërkombëtare. Njohja e Kosovës është e njëjta mënyrë për të futur në BE. Duke i shtyrë vendet që ta tërheqin njohjen e Kosovës, ju jeni duke e goditur vetën me duart tuaja dhe unë nuk e kuptoj këtë”, iu drejtua Heusgen, ministrit të jashtëm serb, Ivica Daçiç.
Interesante është për tu parë se si do të implementohet pajtimi i Kosovës me Serbinë në vitin 2019, sipas qëndrimit amerikan, dhe si do bashkëpunojnë dy vendet që të mos i prishin qefin Bashkimit Evropian, që ndan qasje të ndryshme nga SHBA për ndryshimin e kufijve midis dy vendeve. D.l
