Komiteti Teknik i Ekspertëve, ka reaguar pas debatit publik mbi numrin e testimeve që është duke kryer Shqipëria, në kuadër të luftës kundër Covid19.
Komiteti thekson se ky debat zhvillohet në mbarë botën dhe ka opinione e qasje nga më të ndryshmet por sqaron se strategjia e testimit për koronavirus bazohet në ekspertizë, në karakteristikat e modelit të përzgjedhur sipas rekomandimeve të OBSh për qëllimin, zbulimin e rasteve, ndjekjen dhe ndërprerjen e zinxhirit të infeksionit.
Komiteti sqaron se përgjegjësia e saj është që të zbatojë një strategji të mirëpërcaktuar, e cila synon të identifikojë rastet, të ndjekë dhe të ndërpresë zinxhitin e transmetimit të infeksionit. Një strategji që, duke u nisur nga konstatimet dhe rezultatet e derisotme, nuk gjejnë asnjë arsye për ta rikonsideruar.
Komiteti Teknik i Ekspertëve vlerëson se masat e marra nga autoritetet shqiptare, kanë qenë tejet të dobishme dhe kanë patur efekte pozitive, dhe shton se në kushtet e krijuara prej masave shtrënguese, puna hetimore në terren dhe rezultatet e saj, kanë qenë optimale deri në këto momente.
Edhe për këtë arsye, Komiteti Teknik i Ekspertëve nuk sheh asnjë arsye për të rikonsideruar planin e paracaktuar Strategjik.
Komiteti ka gjithashtu një lutje për të gjitha burimet e informimit, si dhe të gjithë aktorët dhe faktorë publikë, që të sigurohen që opinionet e tyre joprofesionale, apo profesionalisht të palidhura drejtpërdrejt me përgjegjësinë e jashtëzakonshme të Komitetit Teknik të Ekspertëve, të mos krijojnë konfuzion, të hapin shtigje për hamendësime dhe gjykime të gabuara nga ana e opinionit publik, mbi punën tonë.
Komiteti sqaron se janë tejet të inkurajuar mbi rezultatet e arritura deri më sot, teksa shton se në mungesë të masave që kemi marrë dhe strategjisë që është ndjekur, do të gjendeshim në kushtet e kolapsit të plotë të sistemit tonë shëndetësor.
Në fund, Komiteti Teknik i Ekspertëve siguron të gjithë qytetarët shqiptarë se udhërrëfyesi i tyre i vetëm, është ndërgjegja profesionale./Opinion.al
