Ka nisur me debate seanca e sotme plenare. Opozita kërkoi që të diskutohet mbi komisionin ad hoc të reformës zgjedhore. Ndërsa kryetaret e grupeve të PS dhe LSI kërkuan që të shtyhet për javën tjetër. Basha nga ana tjetër pretendoi se po i mbyllet goja opozitës.
Më pas pati një debat mes Bashes dhe Ruçit që çoi në ngritjen e opozites në këmbë rreth foltores dhe nderprerjen e seances plenare
Basha: “Ky biçim parlament po degradon, sot ne rend dite kemi çështjen e zgjedhjeve, opozita ka depozituar kërkesën për debat me emrat e folësve ju vini të papërgatitur për debat se nuk e doni debatin, për t’i mbyllur gojën opozitës me kartona. Mblidh konferencën e kryetarëve tani, opozita e ka bërë kërkesën pro rregullores. Ky parlament s’është pronë e mazhorancës, as e jotja, prandaj ndërpre tani seancën, konstato kush ka përgjegjësinë për këtë problem.
Keni lepurin në bark, jeni në hall me “rrugën e Elbasanit”, mblidh Konferencën e Kryetareve ose bëhu përgjegjës për bllokimin total të punimeve të këtij parlamenti, vendos për një afat të arsyeshëm debati, s’mund të shtyhet me një javë, ne kemi kërkuar orën 16:00, por kjo seancë s’mund të procedojë në shkeljen e rregullave”.
Ruçi: Nuk ka asnjë atribut konferenca e Kryetarëve kur seanca është e mbledhur për rendin e ditës, propozohet një pro dhe një kundër qoftë për futje ose nxjerrje nga rendi i ditës, diskutuan tre kolegë ndërkohë. Sipas nenit përkatës për të futur ose nxjerrë çështje të caktuara nga rendi u votua dhe konferenca e kryetarëve nuk merr kompetenca që nuk i ka. Kjo cështje është e mbyllur, nuk është mbyllje e gojës e opozitës, do ishte e tillë nëse unë nuk do lejoja të kishte diskutim, diskutim të ketë, nuk është e drejtë e seancës, as imja të ndërpresë diskutimin, kjo cështje konsiderohet e mbyllur”- tha Ruçi, duke iu përgjigjur Bashës.
Teksa ai sqaronte, Basha ka qëndruar në foltore dhe përreth u mblodhën deputetet e PD-së.
Ruci njoftoi se ai nuk ka të drejtë të pushtojë foltoren. “Do ndëshkohesh dhe nuk dua ta nis seancën me ndëshkimin tuaj si deputet, zoti Basha ke pushuar foltoren. Tërheq vërejten sipas rregullores”- tha Ruci dhe njoftoi 5 minuta pushim.
