“Këtu po manipulohet. Pse nuk e dimë ne se këtu duhet bërë teatri i ri?” Kështu u shpreh sot aktori i mirënjohur Alfred Trebicka në shenjë revolte ndaj kolegut të tij, Laert Vasili i cili dje u deklarua hapur për projektin e qeverisë.
Vasili do të shprehej: “Unë kam 20 vjet në skenat e Europës. Nëse nuk e do përvojën time në skenat e Europës, po të duash flasim për… balonë tauke balonë tabake”.
Një ditë më pas, Alfred Trebicka e ka quajtur një “qurrash” aktorin e vetëm që ka dalë hapur pro shembjes së godinës së Teatrit Kombëtar. Trebicka ka qenë i ftuar në emisionin “Ditë e re” në Ora News, ku ka thënë:
“Edhe unë jam për teatër të ri. Mos të na tregojnë çudira këta që kanë punuar nëpër gjithë teatrot e Evropës dhe erdhën tani që ti tregojnë Tiranës apo Shqipërisë se si bëhet teatri.
Na tregojnë çudira këta se si një teatër i ri do të ishte dinjitet, nuk e dimë ne këtë, që ky teatër i ri me të gjitha kushtet komode, bashkëkohore është në të mirën e teatrit. Dhe ne nuk e dinim këtë, shyqyr që erdhën këta qurrashët dhe na e treguan. Për teatër të ri janë të gjithë aktorët, i gjithë komuniteti teatror.
Por problemi këtu është se po luhet, po manipulohet me preferenca apo me qëndrime, ti je për këtë, ai është për atë. Është diskutuar vazhdimisht gjatë këtyre ditëve se komuniteti i artistëve është i përçarë, është i ndarë. Në komunitetin e artistëve në mënyrë shumë të arsyeshme ka diversitet. Dhe marrëdhëniet që janë brenda aktorëve po përpiqen t’i manipulojnë sepse është pjesë e së tërës.
Siç është degraduar ndërtesa, degradohet komuniteti e pastaj vijmë tek individi, siç ishte rasti i fundit me zotin drejtor që po përpiqet të denigrojë disa figura që janë të padenigrueshme. Kjo është pjesë e strategjisë afatgjatë për të ardhur deri në këtë pikë. Një nga gjërat pozitive të takimit me Erion Veliajn është se pjesa më e madhe e atyre që ishin aty thanë mendimin e tyre.”
