Ish-ministri i Jashtëm, Besnik Mustafaj ka komentuar debatet e brendshme brenda Partisë Demokratike, nisur edhe nga intervista e ish-kryeministrit Sali Berisha që lëshoi jo pak kritika në drejtim të kryetarit Lulzim Basha.
Duke folur në ‘News 24’, Mustafaj e konsideroi të domosdoshme një platformë të Bashës për të krijuar kohezionin brenda partisë. Sipas tij, kjo është mënyra e vetme që Lulzim Basha të mbajë të bashkuar PD-në, e cila rrezikohet nga përçarja.
“Nëse kryetari do të shfaqë një program ku garantohet kohezion, atëherë mund të bëhet (bashkimi). Basha duhet ta kuptojë se nëse ka vullnet dhe vizion do të mund të shpalosë platformën që i garanton kohezionin e partisë, lirinë e brendshme dhe në fund rezulton me bashkimin e forcave”, tha Mustafaj.
Ai kërkoi që kryetari i PD-së të pranojë edhe kritikat që i bëhen nga zyrtarë të tjerë të partisë, pasi siç u shpreh ai, në partitë e djathta ka gjithnjë nuanca qëndrimesh të ndryshme.
