TIRANE- Deputetja socialiste Arta Dade kritikon ashpër mënyrën se si po funksionojnë organet e shtetit, madje kritika të forta ka lëshuar ndaj ministrit të Brendshëm, Saimir Tahiri. Gjithçka është zhvilluar në mbledhjen me dyer të mbyllura të grupit parlamentar të Partisë Socialiste. Në këtë mbledhje deputetët kanë diskutuar për axhendën e ditës së sotme të Kuvendit, ku do të kalojnë një sërë ligjesh mjaft të rëndësishme, mes të cilave edhe projektligji “Për trajtimin e pronës dhe përfundimin e procesit të kompensimit të pronave”. Në këtë pikë, deputetja Arta Dade ka kërkuar që të denoncojë në sallën e Kuvendit, pikërisht një çështje që ka një vit e gjysmë që e shqetëson atë dhe banorët e pallatit ku ajo banon, përballë sallës së parlamentit. Burimet nga mbledhja e grupit bënë me dije për
Debatet ka qenë me tone të larta mes deputetes së njohur të PSsë dhe ministrit të Brendshëm, deri aty sa Dade të akuzojë Tahirin se “mbron banditët e jo deputetët e qytetarët e thjeshtë”.
DEBATI
“Ka më shumë se një vit që kemi bërë ankesë në organet e policisë për një njeri që ka ardhur nga Velipoja, ka ndërtuar në tarracën e pallatit pranë parlamentit, ku banoj unë, dhe qytetarë të tjerë, të cilët më trokasin në derë. Kam kërkuar ndihmën e policisë të sqarojë këtë çështje, dhe nuk ka ardhur njeri. Kam kërkuar ndërhyrjen e INUKut dhe drejtoresha nuk hap telefonin. Zoti ministër, a mund të më japësh një sqarim lidhur me këtë shqetësim, që nuk është vetëm i imi, por i të gjithë banorëve të atij pallati? Si mund të vijë një tjetër e të ndërtojë mbi shtëpitë tona, mbi ç’të drejtë?!”, – mësohet të jetë shprehur deputetja Arta Dade.
Nga ana e tij, ministri i Brendshëm, Saimir Tahiri mësohet të ketë thënë se e ka verifikuar dhe personi që ndërton në atë pallat ka leje të rregullt. Por, deputetja Dade mësohet të ketë sqaruar se edhe ajo nga ana e saj e ka bërë këtë verifikim dhe personi që ka ngjitur mbi tarracën e pallatit ku banojnë qytetarët ka vetëm leje për shtrim pllakash, që e ka marrë nga Lulzim Basha kur ishte kryetar bashkie, dhe jo leje për ndërtim. Dade mësohet gjithashtu të ketë thënë se banorët i trokasin në derë, si deputete dhe përfaqësuese e popullit që është, por nuk gjen zgjidhje nga institucionet e shtetit.
Më tej, debati ka vijuar edhe më i ashpër, ndërsa Dade i ka thënë Tahirit se “si ka mundësi që mbroni banditë dhe jo një deputet dhe qytetarët e thjeshtë të këtij vendi”. Sipas Dades, ndërtuesi i dy kateve pa leje ka qenë sponsorizues i fushatës së PSsë në Shkodër dhe mik i Tom Doshit. Në këtë moment, mësohet se ministri i Brendshëm, Saimir Tahiri është shprehur se as nuk e njeh këtë njeri, por ka dhënë prova se nuk pyet për miq kur vjen puna te zbatimi i ligjit. “Ka
sponsorizuar, s’ka sponsorizuar, unë nuk e njoh fare atë njeri, por edhe po ta njihja, këtë do të bëja. Kam dhënë prova që nuk pyes për miq e jo miq kur vjen puna te zbatimi i ligjit”, – mësohet të jetë shprehur Tahiri, sipas burimeve nga mbledhja e grupit të PSsë.
Në fund, Dade i ka kërkuar leje kryetarit të grupit, Gramoz Ruçi, për të diskutuar dhe denoncuar rastin sot, në seancën parlamentare. “Ky zotëri po dhunon banesën time”, mësohet të jetë shprehur Dade, duke i njohur kolegët e saj me dëmet morale dhe materiale që i ka sjellë ky ndërtim në shtëpinë e saj. “Në studion time, sa herë bie shi duhet të vë legen të pres ujin”. Ndërkohë, ministrit Tahiri i ka sugjeruar që të dalë ta shikojë me sy të lirë ndërtimin dykatësh në oborrin e parlamentit.
Burimi: Gazeta Shqiptare
