Seanca e fundit plenare ka nisur me debate. Elisa Spiropali, kryetarja e Kuvendit i mbylli mikrofonin deputetes demokrate, Zheni Gjergji, kur ajo nisi të fliste për zjarrin e madh në Elbasan që shkaktoi tym toksik.
Spiropali nuk e lejoi deputeten të fliste për çështjen e Elbasanit duke thënë se ajo nuk është çështje për procedurë.
“Zjarri në Elbasan është një alarm i fortë për gjendjen dramatike të mjedisit dhe pasojë ë dështimit të projektit të inceneratorit”, tha deputetja demokrate.
Pas kësaj Spiropali i mbylli mikrofonin, duke i thënë: “Mund të flisni në rendin e ditës, por mos abuzoni me procedurën, ndoshta është çështje e rëndësishme për të biseduar”.
Gjithashtu deputetja Jorida Tabaku, ra dakord me kërkesën e Zheni Gjergjit, duke kërkuar në emër të opozitës debat parlamentar për situatën me zjarrin në Elbasan.
“Na duhet një debat parlamentar për situatën në zjarr! Janë 430 mln euro korrupsion duhet të hetohet, çështja nuk është mbyllur. E kemi nisur këtë diskutim në 2017-ën. Sot asnjë incenerator nuk punon dhe Kuvendi duhet të mbajë përgjegjësi për tre kontrata, pse janë miratuar pagesat, ky skandal mjedisor vazhdon dita-ditës dhe agravohet”, tha Tabaku.
