Ka nisur me debate mbledhja e sotme e Komisionit parlamentar të Integrimit, shkak është bërë ardhja me vonesë në mbledhje e zv/ministrit të Jashtëm Etjen Xhafaj.
Në rend dite Komisioni kishte shqyrtimin nen për nen të buxhetit për vitin 2020. Por pas ardhjes së Xhafajt, deputetja Rudina Hajdari i ka kërkuar llogari për vonesën zëvendësministrit.
“E papranueshme vonesa në mbledhje. Në komision duhet të jetë ministri në detyrë”, deklaroi Hajdari e cila bashkë me deputetin tjetër të opozitës së re Ralf Gjoni kanë debatuar me deputetët e PS për vonesën, duke pretenduar për shpërfillje të komisionit.
Më pas Hajdari dhe Gjoni kanë braktisur mbledhjen, e cila është drejtuar më tej nga nënkryetarja e Komisionit Senida Mesi.
Zv/ministri Xhafaj ka kërkuar ndjesë për vonesën që u bë shkak për debat në komision. Ai ka deklaruar se ministri i Jashtëm në detyrë Gent Cakaj ka udhëtuar drejt Bratislavës ku do zhvillohet një mbledhje e OSBE-së. Ndërkohë, Komisioni parlamentar i Integrimit vijon diskutimin për buxhetin e vitit të ardhshëm./Opinion.al
