Një test për të provuar edhe futbollistët e tjerë të grumbulluar. Një mundësi për të përforcuar grupin, megjithatë me mendjen gjithmonë te objektivi final: kualifikimi në Euro 2024.
Trajneri Sylvinho këmbëngul se gara nuk ka përfunduar, teksa sqaron edhe zërat për një debat me sulmuesin Armando Broja.
“Tre katër lojtarë e kemi vendosur që do të ndryshojnë në formacion. Por mund të ketë edhe ndonjë rrotacion më tepër. Megjithatë nuk mund ti them emrat në stërvitjen e fundit përpara ndeshjes me Bullgarinë. Nuk do të ishte e drejtë ndaj futbollistëve. Në futboll nuk ka çelës apo sekret. Nuk ka mbaruar asgjë, mbetemi të përqendruar te objektivi ynë. Nuk mendojmë për finalet e Europianit, por vetëm për ndeshjet e nëntorit. Me Brojën nuk ka ndodhur asnjë debat. Është kthyer nga një lëndim i gjatë, kishte disa shqetësime fizike. Bëmë kontrollet mjekësore dhe së bashku vendosëm që nuk është gati për lojë, sepse kishte disa dhimbje dhe nuk mund ta rrezikonim.”
Sylvinho – Trajneri i kombëtares
Edhe pse trajneri provon të mbajë ekipin me këmbë në tokë, Thomas Strakosha pohoi se kur nevojitet vetëm një pikë, sytë janë hedhur edhe nga eventi në Gjermani.
“Jemi vetëm një pikë larg Europianit. Për ne nuk ka miqësore. I shfrytëzojmë këto ndeshje për të krijuar një grup solid, për të qenë gati për ndeshjet e nëntorit, por edhe për më tej në Euro 2024.”
Thomas Strakosha – Portier i kombëtares
Shqipëria luan miqësoren me Bullgarinë në Arenën Kombëtare këtë të martë, duke nisur nga ora 18:00.
