Ai është një nga talentet premtues të Kombëtares së Shqipërisë por i duhet të piqet ende si lojtar. De Biasi e ka në planet e tij të Francë 2016, por Rey Manaj duhet të tregojë më të mirën e tij me Interin për të merituar një fanellë në Europian. Në intervistën e dhënë për “Opinion” interesimit të gazetarit Blendi Fevziu lidhur me keqkuptimin qe ndodhi me Manaj, De Biasi i është përgjigjur: “Absolutisht asgjë e jashtëzakonshme. Ju përcoll diçka qe unë kisha thënë e cila ishte diçka pozitive dhe jo negative, dhe duke qenë se ai ndoshta nuk është shumë i zgjuar nga pikëpamja e komunikimit, gaboi por e kuptoi menjëherë gabimin dhe u pendua, por duhet thënë se është i ri dhe prandaj ndodhin këto gjëra. Ai është vetëm 18 vjeç, ka lindur në vitin 1997, është një fëmijë por është një djalë shumë i mirë”. Pyetjes së gazetarit Fevziu nëse do të jetë Manaj lojtar i kombëtares së Shqipërisë në Francë, De Biasi është përgjigjur se çdo gjë varet nga lojtari. “Nëse ai do të bëjë një kampionat të mirë me Interin po patjetër që mund të jetë pjesë e ekipit në Francë. Po nuk luajti do ta ketë më të vështirë.”
