Një ditë pas ndeshjes me Marokun, situata brenda skuadrës kuqezi është gazmore, e qetë dhe në kushte optimale pune. Trajneri De Biazi dhe stafi i tij kanë ideuar në detaje seancën stërvitore, duke programuar diçka të veçantë për disa grupe lojtarësh.
Në bazë të ngarkesave fizike që kanë marrë gjatë ndeshjes miqësore, stafi i trajnerit kishte programuar tre lloje të veçanta stërvitjeje për grupe të ndryshme lojtarësh.
Ka qenë një stërvitje jo e unifikuar. Sokol Cikalleshi, Mërgim Mavraj, Berat Gjimshiti dhe Elseid Hysaj nuk kanë zbritur në fushë. Të katër lojtarët që ishin për 90 minuta në fushën e lojës, së bashku me njërin nga pjesëtarët e stafit kuqezi, i janë drejtuar një qendre fitnesi dhe relaksi në kryeqytet, për të bërë një seancë në vaskë me ujë të ftohtë për qetësim.
Hyka, Gashi, Xhaka, Basha, Kaçe, Sadiku dhe Abrashi kanë zhvilluar fillimisht disa vrapime rreth fushës dhe disa ushtrime me goditje drejt portës. Pjesa tjetër e lojtarëve ka zhvilluar një seancë përgatitore me ngarkese me te larte fizike, nen drejtimin e Alberto Bele.
Tramexani dhe De Biazi janë fokusuar te disa ushtrime ku në fokus ishte kombinimi i lojtarëve, mes tyre goditja drejt kuadratit. Pavarësisht rolit të lojtarit, secili dilte përballë me një nga tre gardianët, për të provuar të realizojë. Sa herë kishte ekzekutim të bukur, të pranishmit në stadium e shoqëronin me brohoritje.
Situata loje
Për rreth 40 minuta, pjesa e mbetur e skuadrës ka zhvilluar disa ushtrime, të cilat ishin të ngjashme me ato që janë përdorur edhe në Austri. Futbollistët viheshin në situata loje me kundërshtarë që imponoheshin nga Tramexani. Në momente të caktuara, futbollistët kishin detyrë për të sulmuar portën dhe në fragmente të tjera duhet të ekzekutonin detyra mbrojtëse.
Në këtë ushtrim, lojtarët duhet të ishin të shpejtë në veprime, vigjilentë për të kuptuar situatën, në rast se do të duhet të dilnin në kundërsulm apo të mbronin një kundërsulm të kundërshtarit dhe të kishin saktësi në goditjet drejt portës. Krahas ngarkesës fizike, vëmendja kryesore ka qenë precizoni i futbollistëve drejt portës. Mungesa e golit në ndeshjen e fundit duket që nuk i ka pëlqyer trajnerit, i cili i ka kushtuar vëmendje këtij aspekti në seancën përgatitore, një ditë pas Marokut./Panorama
