Sipërmarrësi italian Davide Pecorelli ka rrëfyer përse sajoi vdekjen në Shqipëri dhe u zhduk për 8 muaj me radhë.
Në një intervistë për median italiane “La Nazione”, Pecorelli ka thënë se u zhduk për shkak të problemeve financiare që ai kishte me bankat, pasi biznesi i tij filloi të falimentonte për shkak të pandemisë së Covid-19.
“U persekutova nga kreditorët. Kohët e fundit më kishin kërkuar dyqanin Sansepolcro duke më kërcënuar. Isha pa asnjë Euro në xhep. As për karburant nuk kisha. Kisha futur në telashe edhe partneren time. Më vriste ndërgjegjia për fëmijët e mi. Babai më ka mësuar gjithmonë që ta paguaj borxhet deri në qindarkën e fundit, por për fat të keq kriza nga Covid më shkatërroi”, thotë ai.
-Donit t’i jepnit fund?
Pecorelli: Kur u nisa për në Shqipëri jo. Kërkova një shans të fundit. Fillimisht në Shkodër e në Tiranë duke u përpjekur të shisja produkte kozmetike dhe një aparaturë me vlerë 100 mijë Euro. Pastaj në Pukë.
-Po më pas?
Pecorelli: Kërkova një prift për t’u rrëfyer. Do t’i jepja fund jetës. I kisha humbur shpresat. Prifti tha se kishte një opsion tjetër.
-Pra ishte ai që propozoi të organizonit vdekjen?
Pecorelli: Po, më ndihmoi dhe ai. Por nuk është e vërtetë që i morëm eshtrat nga një varr tjetër. Makinën duhet ta hidhnim nga shkëmbi, por nuk mundëm ta shtynim poshtë.
-Si quhet prifti?
Pecorelli: Nuk do ta tregoj kurrë.
-U tha se ishit në Medjugorie, por dolët në Vlorë?
Pecorelli: Prifti më tha se mund të shkoja në një vend ku askush nuk do të më kërkonte. Për 4 muaj kam qarë.
-Po në Vlorë?
Pecorelli: Është e vërtetë, kam qenë atje, por nga data 7 Maj.
-U kthyet në Itali më 12 Shtator. Përse?
Pecorelli: Për thesarin. Mbërrita në Romë me autobusin e pelegrinëve. Mora para nga një bankomat, shkova në Grosseto dhe më pas në Giglio. Të martën mora me qira gomonen dhe u nisa drejt Montecristo, aty ku është zona e parë ku gjenden monedhat.
-Duket si një histori që ka më shumë të fshehta. A është kështu?
Pecorelli: Absolutisht jo. Kam patur të bëj me njerëz të besueshëm që e kanë studiuar këtë gjë për më shumë se 50 vjet.
-Po pse pikërisht ty?
Pecorelli: Ndoshta e kanë parë se isha i vetmi që mund të realizoja një plan të tillë. Nuk kisha asgjë për të humbur.
-Shqipëria mund të marrë masa kundër jush për krimet që keni bërë. A jeni i shqetësuar?
Pecorelli: Po.
-Po tani?
Pecorelli: Tani do të përpiqem të rifilloj jetën normale mes vështirësive të shumta që kam hasur me kthimin tim. Nuk do të jem më sipërmarrës në Itali. Po mendoj të hap një shoqatë për të mbështetur sipërmarrësit.
-Me çfarë parash?
Pecorelli: Karabinierët gjetën çelësat e garazhdit që kam marrë me qira në Porto Santo Stefano ku do të mbaja thesarin. I kanë të gjitha videot dhe hartat. Kërkova ekspertin e monedhave të vjetra dhe ai tha është e pabesueshme ajo që ke zbuluar. Më 23 Shtator kishim një takim në një hotel në Arrezo. Por ata më kapën.
-Dhe me atë thesar të paligjshëm çfarë do të bëje?
Pecorelli: Kisha lënë takim me një person për të shitur arin në Firence.
-Pra, sipas llogarisë tuaj ka ende diçka që mungon?
Pecorelli: Ditën që ata më kapën, unë shkova ta merrja. Karabinierët më panë në Cala Maestra, bëra sikur më kishte mbaruar benzina.
-Bazuar në zbulimin që keni bërë, çfarë keni ndërmend të bëni tani?
Pecorelli: Jam i bindur se më në fund do të gjej qetësinë për jetën time dhe familjen time.
-Shkrimtar me emrin Cristiano në Vlorë dhe gjeologu Giuseppe me dokumente false. Keni ndryshuar identitet?
Pecorelli: Dokumentin Giuseppe ma ka lënë ai dikur sepse duhej të më paguante për dhomën e hotelit. E përdora duke vendosur foton time dhe profesionin, gjeolog.
-Gjithçka duket paksa e ekzagjeruar…
Pecorelli: Këndvështrimi im për jetën ka qenë gjithmonë ndryshe, përndryshe unë nuk do të kisha krijuar një ekip futbolli 10 vite më parë, Longobarda.
-Keni lidhje me trafikun e drogës Shqipëri-Itali?
Pecorelli: Absolutisht që jo. Ata që më njohin mirë e dinë se çfarë kam bërë unë në të kaluarën kundër drogtës. I refuzoj ata që kanë ngritur këtë skenar. / Tv Klan
