Gjatë Papatit, Papa Françesku i cili u nda nga jeta mëngjesin e sotëm, vizitoi 66 vende të botës, me 47 udhëtime episkopale. Udhëtimi i parë i tij në Evropë si Papë ka qenë pikërisht në Shqipëri më 21 shtator 2014.
Një udhëtim që i la mbresa të jashtëzakonshme, pasi takoi dhe dëgjoi rrëfimet e klerikëve që kishin vuajtur në kohën e diktaturës komuniste. Vizita e tij ka lënë gjurmën e saj te populli shqiptar, por edhe anasjelltas.
Majlinda Frangaj, ambasadorja e Shqipërisë në Vatikan, shprehet në programin “Rudina” në Tv Klan se ai ruante respekt dhe dashuri ndaj vendit tonë. Pritja e tij në Shqipëri i ka lënë mbresa të jashtëzakonshme dhe ai e përmendte shpesh.
Buzëqeshja dhe mirësia ishin veti të tij që e shoqëronin gjithmonë. Ambasadorja Frangaj ndan kujtime nga takimi i fundit me Atin e Shenjtë, ku ishin edhe 100 studentë, mes tyre një vajzë shqiptare e besimit mysliman që donte të pagëzohej.
Majlinda Frangaj: Një respekt dhe dashuri ndaj personit tim, por një respekt dhe dashuri edhe ndaj Shqipërisë dhe them ka qenë e ndërsjelltë. Unë kam parë edhe popujt e tjerë, e kanë pritur… çdo popull e pret Papën në mënyrë të jashtëzaknshme, por ajo pritja në Shqipëri Papës i ka ngelur dhe e ka përsëritur gjithmonë. Shpeshherë, në shumë raste ai e ka përmendur sesi e priti populli shqiptar, edhe populli shqiptar e deshi Papën. Pastaj e ka treguar në të gjitha aktivitetet që janë organizuar, tani më 5 shkurt ishte hera e fundit që pata mundësinë që të bisedoj mePapën, dërgova te Papa Françesku mbi 100 studentë shqiptarë ku ishte edhe ministri i Jashtëm, edhe ministrja e Arsimit dhe pak ditë më vonë, ne e takuam në datën 5 shkurt, më 14 u shtrua në spital ku u tha që ishte kritike për jetën situata e tij shëndetësore. Me buzëqeshje, i priti studentët me shumë dashuri. Kemi rastin të shtunën e madhe të Pashkëve, parmbrëmë, ndër të pagëzuarit ishte një vajzë shqiptare që ishte një nga studentet e datës 5 shkurt që unë dërgova te Papa. Ajo iu afrua dhe i tha që donte të pagëzohej, ishte e besimit mysliman dhe Papa e bëri të mundur. Nuk qëlloi Papa që të bënte ritin e pagëzimit ditën e shtunë, por Papa kishte hyrë në Bazilikën e Shën Pjetrit pak orë më përpara se të kryhej riti i meshës dhe riti i të pagëzuarve dhe e kishte takuar.
