Pas dështimeve të njëpasnjëshme të qeverisë shqiptare për të gjetur një gjyqtar të denjë për në Gjykatën e të Drejtave të Njeriut në Strasburg duket se është gjetur njeriu i duhur. Asambleja Parlamentare e Këshillit të Europës pritet të votojë Darian Pavlin si kandidatin më të kualifikuar, nga 3 emrat e propozuar nga qeveria shqiptare. Ai do të zëvendësojë Ledio Biankun, anëtarit që i kishte përfunduar mandati prej kohësh në Gjykatën e Strasburgut.
Në axhendën e punimeve të Asamblesë Parlamentare të Këshillit të Europës (KiE-s) bëhet e ditur se Komiteti për Çështjet Ligjore ka marrë në intervistë më 28 shtator të tre kandidatët e paraqitur zyrtarisht nga qeveria dhe se i rekomandonin AP-së, me një shumicë dërrmuese, Darian Pavlin si kandidatin më të kualifikuar.
Ledi Biankut i kishte përfunduar mandati prej 2 vitesh, por vijonte detyrën pasi kandidaturat e reja të Shqipërisë ishin rrëzuar. Tre herë Qeveria ka paraqitur lista kandidatësh, për shkak se ato u refuzuan nga KiE.
Veçojmë faktin se në të tre rastet emri i ish anëtarit të Gjykatës Kushtetuese, Sokol Berberi ka qenë i përfshirë si kandidat, kështu në listën e paraqitur më 8 mars të vitit 2017, në listën e 20 prillit dhe të 24 korrikut të vitit 2018.
Përfshirja e emrit të Berberit shkaktoi reagime të opozitës, pasi ish-gjyqtari është kunati i ministrit të Brendshëm, Fatmir Xhafaj.
Darian Pavli
Pavli ka lindur në vitin 1975 në Vlorë dhe ka master nga Universiteti Qendror Europian (Hungari) dhe ligjin e shërbimit publik nga Shkolla e Ligjit e Universitetit të Nju Jorkut (SHBA).
Pavli është jurist me 15 vjet përvojë në dizenjimin, koordinimin dhe zbatimin e aktiviteteve që promovojnë mbrojtjen e të drejtave të njeriut në Nju-Jork, Tiranë, Open Society Justice Initiative (SOROS) , Human Rights Ëatch. Ai ka qenë i përfshirë rajonin e Këshillit të Europës, aktualisht ekspert ligjor pranë EURALIUS.
Pavli ka qenë i angazhuar edhe në procesin e Reformës në Drejtësi ku ka shërbyer si këshilltar i Komisionit të Posaçëm Parlamentar i Reformës në Drejtësi.
