Eshtë dëbuar nga Danimarka sepse punonte shumë. E pabesueshme, por e vërtetë. 30-vjeçari ka marrë një letër dëbimi nga shteti danez sepse kishte shkelur limitin prej 15 orësh të përcaktuara si punë për një student. Marius Youbi, nga Kameruni kishte punuar 90 minuta më shumë në kompaninë e pastrimit, ku ai ishte i punësuar part time.
Kaq ka mjaftuar për tja ndërprerë ëndrrën e përfundimit të studimeve në degën e inxhinierisë elektrike, vetëm dy semestre nga diplomimi.
«Jam i trishtuar dhe i zhgënjyer, katër vite të jetës sime shkuan në lumë», ka pohuar Marius para se të largohej nga aeroporti Billund. «Po ndërtoja një të ardhme në Danimarkë, është e tmerrshme që më duhet t’i them lamtumirë gjithë kësaj ».
Youbi është përpjekur t’i shpjegojë punonjësit të zyrës së emigracionit që nuk i ka kaluar 15 orët e punës në javë, por përgjigja ka qenë e prerë: “Ke thyer rregullat, duhet të ikësh”.
Studentët e universitetit në të cilin ai studionte janë ngritur në protestë për të lejuar qëndrimin e tij, duke thënë se ishte studenti më i mirë i universitetit.
