Sot në mbledhjen e kryesisë të Partisë Socialiste është vendosur që Damian Gjiknuri të jetë Sekretar për Çështjet Zgjedhore. Në këtë mënyrë, ish-Ministri i Energjisë dhe Infrastrukturës merr një pozicion në parti, që më parë e ka mbajtur Bledi Çuçi. Ky i fundit, u emërua Ministër i Bujqësisë në ndryshimet që kryeministri Rama bëri në kabinetin qeveritar në fund të muajit dhjetor.
I menjëhershëm ka qenë reagimi i Partisë Demokratike, ku zëdhënësja Ina Zhupa thotë se Damin Gjiknuri do të duhej të ishte pas hekurave nëse do të hetohej dosja 184.
“Modeli i zgjedhjeve te Dibres, modeli i blerjes se votes, i krimit, i intimidimit te votuesve, i parave te pista ne fushate, eshte modeli qe kerkon Rama per gjithe Shqiperine ne zgjedhjet e ardhshme! Personi qe duhet te ishte ne burg po te hetohej dosja 184, sot merr stafeten te jete ne krye te reformes zgjedhore!”, ka thënë Ina Zhupa.
Nga ana tjetër, këto akuza Taulant Balla i ka quajtur pjesë të baltës së PD-së, duke thënë se Gjiknuri është ndër ekspertët më të mirë në çështjet zgjedhore.
“Damian Gjiknuri është një prej ekspertëve më të mirë për çështjet zgjedhore që ka sot Shqipëria”, tha Balla./Opinion.al
