Sot, në ora 12:30:59, Instituti i Gjeoshkencës ka regjistruar një lëkundje tërmeti me magnitudë ML=4.4 shkalla Rihter, por që u ndje 5 – 6 Ballë.
Epiqendra është në fshatin Vinjollë, bashkia Mat, 13 km veriperëndim të Bulqizës dhe 17 km në juglindje të qytetit të Burrelit.
Tërmeti është ndjerë i fortë pasi ka qenë 2 km në thellësi të tokës.
Emergjencat Civile bëjnë me dije se, sipas informacioneve të marra nga Njësitë e Qeverisjes Vendore Bulqizë, Burrel, Klos dhe Peshkopi, nuk ka dëme në njerëz. Po evidentohen dëmet materiale në banesa dhe objekte të tjera.
Lëkundjet e tërmetit janë ndjerë në territoret e qarkut Tiranë, Dibër dhe Elbasan.
Specialistët e Qendrës Kombëtare Operacionale të Emergjencave civile po mbajnë kontakte të vazhdueshme me të gjitha njësitë e qeverisjes vendore dhe strukturat e Shërbimit të Emergjencave Civile, Policisë dhe Zjarrfikëseve. /Opinion.al
