Me një pistoletë lodër ia ka dalë të grabisë një kazino në kryeqytet. Ngjarja ndodhi mbrëmjen e djeshme tek ‘Selvia’ në Rrugën e Dibrës. Autori, siç shihet në pamje ka patur një kapuç mbi kokë dhe nën kërcënimin e armës (lodër) ka arritur që të marrë një shumë parash nga arka e kazinosë.
Sipas policisë, në dalje, roja e sigurisë së kazinosë ka ndërhyrë menjëherë për neutralizimin e tij, ndaj dhe grabitësit i ka rënë pistoleta lodër nga dora. Më pas, grabitësi është larguar me shpejtësi, ndërsa policia është vënë në kërkim të tij. Mësohet se nga këqyrja e pamjeve të kamerave të sigurisë dhe nga përshkrimi fizik, i njëjti person mund të jetë autor edhe i dy grabitjeve të tjera: I një farmacie në rrugën “Siri Kodra”dhe të një marketi në rrugën “5 Maji”. Të dyja këto gabitje kanë ndodhur në muajin Janar. Autori i dyshuar, thotë policia, është identifikuar por ende nuk është kapur.
Në pamjet e mëposhtme shihet momenti kur autori arrin të marrë paratë dhe arkëtarja që i luhet të mos e vrasë se ka fëmijë…
