Policia e Shtetit ka shpërndarë pamjet e operacionit “Never Forget”, me anë të cilit u zbardhën disa ngjarje të rënda kriminale.
Sipas uniformave blu operacioni nisi mbrëmjen e mërkurës dhe vijoi deri në orët e para të ditës së sotme, i cili solli zbardhjen e 6 vrasjeve, 5 atentateve me eksploziv, vjedhjeve me dhunë dhe 3 tentativa pwr kryerje vrasjesh.
Mes të arrestuarve është dhe e dashura e Laert Haxhiut, Klea Gjata.
Organet e drejtësisë priten t’i dorëzojnë autoriteteve greke provat e reja kundër Laert Haxhiut, i cili u arrestua më 23 maj të këtij viti në Janinë. Haxhiu ndodhet në burg dhe po gjykohet për akuzën e largimit nga vendi i aksidentit dhe atë prishjes së qetësisë publike.
Këto ngjarje janë zbardhur falë të penduarit, Artan Tafani 39-vjeçari i cili është anëtar i grupit të Laert Haxhiut, kundërshtar i Aldo Bares.
Tafani u arrestua para një jave për vjedhjen e 30 mijë eurove në një pikë të këmbimit valutor në zonën e Astirit, krim i ndodhur para 3 muajsh. Pas identifikimit policia e ka mbajtur në mbikëqyrje me dyshimin se ai ishte i përfshirë në disa ngjarje të rënda kriminale.
Tafani ka pranuar të dëshmojë duke marrë statusin e të penduarit. 39-vjeçari ka treguar krimet ku ka marrë pjesë dhe të gjithë anëtarët e grupit që drejtohej nga Laert Haxhiu.
6 janë personat e vrarë: Alban Semaku, Çajup Selimi, Albi Bashaliu, Fridmand Xheferraj, Lulzim Qorri dhe Dikens Halili. Dy të fundit u ekzekutuan në Athinë./Opinion.al
