Policia arrestoi më 16 tetor në kuadër të operacionit “Selenica”, 38-vjeçarin Tesi (Tesilvan) Basho i cili konsiderohet person i rrezikshëm pasi akuzohet për një sërë krimesh në Itali dhe Shqipëri.
Kapja e Bashos ka qenë e vështirë për policinë pasi janë organizuar një sërë operacionesh të cilat nuk kishin arritur tek ai. Nga detajet e dala nga hetimi i prokurorisë për të rezulton se ai ka hyrë ilegalisht në Shqipëri pasi u arratis nga burgu i sigurisë së lartë në Romë dhe rinisi aktivitetin kriminal në vitin 2017.
Sipas dosjes, Tesi Basho me ndihmën e vëllait të tij, Santilo Basho ka kërcënuar me jetë një biznesmen të cilit i ka kërkuar 100 mijë euro dhe ka arritur ti marrë 20 mijë euro.
Biznesmeni e kishte denoncuar kërcënimin pasi takimet ku ai dorëzonte shumën e parave janë përgjuar nga policia dhe paratë janë fotografuar. Në takime merrte pjesë Santilo Basho i cili nuk u ndalua pasi prokuroria donte të arrinte tek Tesi Basho që konsiderohej një person shumë i rrezikshëm.
Pas disa aksioneve të dy vëllezërit Basho u arrestuan më 16 tetor dhe krahas akuzave që ka në Itali, Tesi Basho po hetohet edhe për gjobëvënie ndaj biznesmenit bashkë me vëllain.
Ai ka qenë i dënuar me burgim të përjetshëm nga gjykata e Torinos për vrasje, shfrytëzim prostitucioni dhe armëmbajtje pa leje. Në momentin e arrestimit policia i sekuestroi 4 armë zjarri Kallashnikov me 6 krehëra me fishekë, 1 armë zjarri pistoletë me dy krehëra, kallëp me lëndë eksplozive, jelek antiplumb, pajisje elektrike që shërbejnë për kultivimin e bimëve narkotike, 10 kg kanabis, 5 radio marrëse – dhënëse si të Policisë, 900 euro, si dhe dokumente të ndryshme.
Tesi Basho ka pasur seancën e marrjes në pyetje por ka refuzuar të paraqitet dhe procesi vijoi në mungese të tij. /Opinion.al
