Familja e Besmir dhe Viktor Haxhia, dy vëllezërve të vrarë në Durrës, ka hapur dyert e mortit.
Daja i viktimave, Nikollë Preci, mes dhimbjes tregoi se ishte indinjuar mbi komentet mediatike që janë bërë për nipat e tij, ndërsa theksoi se po flasin me shumë se ç’dinë.
Ai deklaroi për Balkanweb se vrasja ka ndodhur rreth një muaj para se të fejohej vëllai i dytë, Viktori, i cili ishte emëruar edhe pedagog i asociuar në UAMD.
Preci shtoi se kërkojnë nga shteti vetëm që të zbardhet e vërteta mbi këtë vrasje, teksa deklaroi se kjo familje, ashtu si shumë të tjera, ka qenë e varfër dhe jetonte në një lagje periferike.
Sipas tij, vetëm duke punuar me punë të pastra, djemtë ngritën gjithçka kishin, teksa shtoi se familja nuk ka asnjë konflikt dhe nuk ka dijeni se për çfarë motivesh ka ndodhur krimi i dyfishtë.
I ati i viktimave, ka treguar se si kishin punuar përgjatë këtyre viteve dy djemtë e tij. Kola, tregoi se dhe vetë ai ka punuar me djemtë si mekanik në servis makinash dhe tek lavazhi.
Babai i viktimave tha se kanë marrë disa kredi për bizneset e tyre, siç ishte dhe një shumë prej 40.000 eurosh, të cilën i duhet ta shlyejë pasi kishte lënë shtëpinë peng. Ai kërkoi nga shteti që të zbardhet e vërteta, ndërsa nga mediat të mos i shqetësojnë e rëndojnë më shumë në gjendjen e rëndë që po kalon familja me variantet e dyshimta që sjellin./Opinion.al
