Ivica Daçiç vijon që të shtyjë para teori konspiracioni, me synimin për ta kthyer një krim në çështje politike. Ministri i brendshëm serb, thotë se vrasja e policit në Llozhnicë nga Faton Hajrizi ishte me paramendim dhe pretendon se në atë ngjarje janë të përfshira dhe disa qendra të ndryshme pushteti në Kosovë.
Duke i kthyer përgjigje thirrjeve të ministres së drejtësisë, Albulena Haxhiu, Daçiç vijon me gjuhën e urrejtjes duke akuzuar qeverinë në Prishtinë se vrasjen e kryer nga Hajrizi e lidh me krimin dhe jo me terrorizmin.
“Ata tani po përpiqen të dalin nga ajo situatë – ai u arratis nga burgu pa u lëshuar asnjë urdhër për të. Shtrohet pyetja se si është e mundur kjo dhe si ai në ditët në vijim ka qenë këtu në Preshevë dhe Bujanoc dhe nuk ka kaluar ligjërisht vijën administrative.”
Ministrja Haxhiu akuzoi Serbinë se po inkurajon dhe organizon arratisjen e të burgosurve, paraburgosurve dhe të kërkuarve nga drejtësia e Kosovës, në këmbim të një “ambienti mburojë ndaj pandëshkueshmërisë e ndjekjes penale të kriminelëve nga organet e Republikës së Kosovës”.
Nga ana tjetër, Daçiç njoftoi se autoritetet serbe do të hetojnë të gjitha rrethanat e këtij rasti, ku po shkonte Faton Hajrizi dhe si i ka marrë dokumentet e të vëllait, si dhe kush po e ndihmonte.
Gjithashtu ministri serb tha se përgjigjet që pret të marrë nga Gjermania dhe Sllovenia do të jenë të rëndësishme për hetimin në fjalë. Daçiç ka kërkuar dhe ekstredimin e vëllait të Faton Hajrizit, me akuzën si të përfshirë në vrasjen e policit. Autori u vra një ditë pas krimit nga policia serbe.
