Ka përfunduar seanca në SPAK ndaj gjyqtarit dhe anëtarit të KPA, Luan Daci, i cili është paraqitur sot zyrtarisht si i pandehur për falsifikim dokumentesh.
Avokati i gjyqtarit, Jordan Daci, tha se nuk ndodhi asgjë e re në këtë seancë, dhe se ata i qëndrojnë të njejtit mendim që nuk ka vepër penale.
“Nuk kishte asnjë provë të re. I takon gjykatës të vendosë për padinë. Ne i qëndrojmë të njejtit mendim që nuk ka vepër penale.”
Sa i përket kërkesës së avokatëve për të pushuar çështjen ata thanë se përderisa SPAK ka vendosur “që çështja të shkojë në gjykim tregon që nuk e ka marrë paraysh”.
Sa i takon faktit nëse KPA duhet ta pezullojë Dacin nga detyra, avokati Daci theksoi se as KPA dhe asnjë institucion tjetër nuk mund ta marrë një veprim të tillë, për sa kohë ka një veprim të formës së prerë nga Gjykata e Apelit se nuk ka vepër penale.
“Pavarësisht cilësisë të pandehurit ka një vendim të Gjykatës së Apelit të Posaçëm që vërteton se nuk ka vepër penale. Nëse do ishin në një situatë pa vendim do të ishte logjike. Nuk ka ndërmend të japë dorëheqje sepse nuk ka asnjë arsye. Ai prezumohet i pafajshëm për sa kohë që nuk ka vendim gjykate kundër tij.”. /Opinion.al
