Ish-deputetja e Partisë Demokratike, Dhurata Çupi shprehet se situata shëndetësore e banorëve të Bulqizës është përkeqësuar pas helmimit të ujit.
Përmes një postimi në “Facebook”, ish-deputetja i ka bërë thirrje Prokurorisë që të nis hetimet dhe personat përgjegjës të përballen me drejtësinë.
Sipas saj, numri i banorët të cilët shfaqin shenja helmimi është duke u rritur çdo ditë, ndërkohë që autoritetet nuk kanë marrë asnjë masë.
“Situata shëndetësore e banorëve të Bulqizës vijon të përkeqësohet dhe numri i të prekurve nga helmimi vjen në rritje. Autoritetet pergjegjese po mundohen kujt tia lënë përgjegjësinë në derë për këtë ngjarje të rëndë.
Banorët e Bulqizës prej tre ditësh po përballen me një situatë të pazakontë duke shkuar drejt 100 numri i të prekurve nga helmimi.
Mjekët thonë se kjo po ndodh për shkak të cilësisë së ujit të pijshëm, nderkohe qe ujësjellësi pret përgjigje analizash.
Nga ana tjetër qytetarët kanë tejmbushur spitalin duke shfaqur shenja helmimi.
Banorët e Bulqizës nuk mund të presin lojën kukafshehti të autoriteteve por duhet të informohen e tu thuhet se cfarë po ndodh me ta dhe nga ju rrezikohet shëndeti i tyre.
I bëj thirrje autoriteteve ligjzbatuese, prokurorisë, të nisin sa më parë hetimin për këtë ngjarje që po rrezikon shëndetin e dhjetra banorëve. Përgjegjësit e kësaj ngjarje duhet të vihen përpara drejtësisë.
Uroj shërim të shpejtë banorëve dhe shpresoj që ky masivizim i helmimit të popullatës të ndalet.”-shkruan Çupi./ Opinion.al E.Xh.
