Drejtori i Teatrit Kombëtar Hervin Çuli ka deklaruar se ka denoncuar në polici grupin e njerëzve që siç thotë ai nuk po e lënë të drejtojë institucionin e Teatrit.
Në një intervistë televizive, Çuli është shprehur se është një grupim (duke ju referuar artistëve që po protestojnë për mos prishjen e godinës) që po e drejtojnë tani Teatrin. Ai ka bërë një denoncim dhe bën thirrje që autoritetet duhet të marrin masa pasi për çdo dëmtim të materialeve ose vjedhje përgjegjësia do të bjerë mbi punonjësit.
“Përfundimisht Teatri nuk drejtohet më as nga unë, as nga Ministria e Kulturës, por nga ky grupim. Detyra ime ka qenë të vë në dijeni organet kompetente, kam bërë një denoncim institucional pranë këtyre organeve, që institucioni nuk është më në kontroll të administratës dhe të punonjësve të Teatrit Kombëtar, kështu që jeni ju që duhet të merrni masat. Denoncimi ka rreth 3-4 ditë, brenda 24 orëshit të momentit që ndodhi ngjarja. Në polici të Tiranës denoncimi. Nuk kam asgjë me aktorët që duan teatrit, por në këtë rast është detyrim institucional në radhë të parë sepse nesër pasnesër mund të ketë objekte të dëmtuara, të vjedhura dhe përgjegjësia është mbi punonjësit. Janë vlera monetare dhe historike të jashtëzakonshme”, u shpreh Çuli.
Drejtori i Teatrit ka thënë gjithashtu se ndërtimi i një godine të re është nevojë urgjente. Ai përmend gardërobat dhe rekuizitat si elemente që rrezikohen të bëhen të papërdorshme dhe gjithashtu shton se ambientet brenda janë në gjendje të papranueshme
“Aty ekziston rreziku për shumë gjëra, vlera e materiale ka të bërë me gardërobën rekuizitë, shpatat, tavolinat, karriget, atmosfera e një skene artistike sepse janë element që janë përdorur 40-50 vite më parë dhe dihet kujt i përkasin. Kostumografia ndër vite, janë pjesë e inventarit dhe të arkivës së artë, një nga arsyet e tjera se pse gjendja në teatër duhet të ndryshoj po na kalben kostumet dhe historia brenda atyre mureve. S’ka hapësira të mjaftueshme. Të shkosh në tualetin e teatrit duhet të rrish skiç, duhet ndërhyrje urgjente”, tha Çuli. /Opinion.al
