Aktualitet

Çuçi inspekton prurjet e Vjosës te Ura e Mifolit: Në gatishmëri edhe FNSH


Bëhu pjesë e Grupit Zyrtar të Opinion.al
>> KËTU <<
               Publikuar në : 16:13 - 10/01/21 |
Semiljana Azizi

Ministri i Brendshëm, Bledi Çuçi, ishte ditën e sotme në Vlorë për të inspektuar situatën e krijuar së fundi, për shkak të reshjeve të shumta të shiut.

Çuçi pa nga afër Urën e Mifolit, ku niveli i prurjeve të Vjosës gjatë orëve të fundit është ulur me rreth 2 metra.

I shoqëruar nga Prefekti i Qarkut dhe drejtues të tjerë lokal të Shtabit të Emergjencave, ministri është shprehur se situata është e qëndrueshme, duke theksuar që strukturat e emergjencës janë në gatishmëri të plotë, përfshirë këtu edhe FNSH.

“Për fat të mirë sot situata paraqitet e stabilizuar, falë edhe disa ndërhyrjeve që janë bërë në disa pika problematike të rrjedhës së Vjosës. Gatishmëria është e plotë edhe nga Policia e Shtetit njësoj si strukturat e tjera të emergjencave. Kam dhënë urdhër që edhe Forcat e Ndërhyrjes së Shpejtë të jenë në gatishmëri të plotë për t’ju përgjigjur çdo nevoje të mundshme gjatë këtyre ditëve”, tha ministri Çuçi.

Edhe pse ditën e sotme reshjet kanë qenë të pakta situata vijonë të mbetet delikate në disa qarqe ku një sipërfaqe e madhe tokë është përmbytur. Sipas meteorologëve në ditët në vijim pritet të ketë një sasi të lartë reshjesh, duke kulmuar kështu me datën 11./Opinion.al

Pas