Ministri i Brendshëm Bledi Çuçi ka prezantuar në mbledhjen e Komisionit të Sigurisë buxhetin e parashikuar për vitin 2023 për ministrinë që ai drejton dhe për institucionet në varësi të saj.
Në fjalën e tij, Çuçi theksoi se në tërësi i gjithë buxheti i parashikuar për vitin 2023 për Ministrinë e Brendshme është 24.1 miliardë Lekë.
Ministri tha se do të ketë rritje të pagave për shumë kategori, përfshirë punonjësit e Gardës, zjarrëfikësit, si dhe punonjësit e ministrisë së Brendshme.
“Në buxhetin e 2023-shin kemi pasur parasysh edhe këto pasoja, përballimin e inflacionit të luftës dhe forcimin e mbrojtjes së sistemeve të Policisë së Shtetit. Në buxhetin 2023, për Policinë e Shtetit, por jo vetëm, do të kemi rritje pagash dhe përkatësisht në lidhje me PSH, rreth 74% e numrit të punonjësve, ku përfshihet niveli bazë, rritja e pagës do të jetë 15%. Nga rritjet më të mëdha që ka pasur brenda një buxheti. Rritje pagash në 7% për Gardën e Republikës dhe Agjencia e Mbikëqyrjes Policore në 13%. Rritje pagash edhe për zjarrfikësit me 7%. Së fundi, për punonjësit e tjerë të Ministrisë së Brendshme, do të kemi rritje page 7%”-tha Çuçi.
Një zë i rëndësishëmë në buxhetin e 2023 është mbrojtja kibernetike. Çuçi bëri me dije se përveç buxhetit 2023 me 547 mln lekë për mbrojtjen kibernetike, edhe AKSHI do financojë me fondet e veta.
“Kapërcim kolosal për buxhetin e mbrojtjes kibernetike. Nëse në 2022 në teknologji të brendshëm, pa donatorë, kanë qenë 72 milionë Lekë, në vitin 2023 janë 547 milionë Lekë, mbi shtatë herë rritje me 2021. Pajisje me teknologji informacioni, dhe në veçanti për mbrojtjen kibernetike. Përveç buxhetit tonë, për Policinë e Shtetit do të financojë edhe AKSHI me fondet e veta, 278 milionë Lek”-tha Çuçi.
