Cristiano Ronaldo ka thyer një tjetër rekord të martën në mbrëmje kur ka kaluar Xavi-n për sa i takon numrit të ndeshjeve me eliminim direkt të luajtura në Champions League.
Sfida e Real Madrid kundër Roma-s në 1/8-at ka qenë ndeshja e 57-të e portugezit pas fazës me grupe dhe e ka lejuar atë të kalojë ish-mesfushorin e Barcelona-s, që mbante rekordin me 56 paraqitje. 34 nga këto ndeshje CR7 i ka zhvilluar me Real dhe 23 me ish-ekipin e tij të Manchester United.
Ronaldo e ka fituar dy herë kompeticionin, me United në 2008-ën dhe “Los Blancos” në 2014-ën.
Ndërkohë, Cristiano ka realizuar në minutën e 64-t kundër Roma-s. Ai gol do të thotë se sulmuesi ka shënuar në 61 ndeshje të ndryshme në Champions League.
Disa lojtarë elitarë nuk arrin as të marrin pjesë në 61 ndeshje të kompeticionit europian gjatë karrierës së tyre, jo më të shënojnë në to.
Për vite me radhë ish Galaktiku Raul ka qenë i papërmbajtshëm në Europë dhe ka shënuar në 56 ndeshje të ndryshme.
Lionel Messi është në kuotën e 51 sfidave dhe sigurisht ky numër do të rritet në të ardhmen, megjithatë, për momentin ai mbetet 10 ndeshje mbrapa rivalit portugez.
